ԵՐԵՎԱՆ, 18 դեկտեմբերի — Sputnik. Հայաստանում այս տարի գնաճը կանխատեսվածից ցածր է։ Այս միտումը պահպանվելու է նաև առաջիկա ամիսներին։ Այսօր լրագրողների հետ հանդիպմանը հայտարարեց ՀՀ ԿԲ խորհրդի անդամ Արթուր Ստեփանյանը` հերքելով վերջին օրերին տարածված լուրերը, թե 2019թ.–ի սկզբում Հայաստանում ֆինանսական դեֆոլտ ու դրամի կտրուկ արժեզրկում է սպասվում։
«Ամբողջ 2018թ.–ի գնաճի հստակ թիվը չեմ կարող ասել, բայց անցյալ տարվա նոյեմբերից այս տարվա նոյեմբերի 12-ամսյա գնաճը 1.8 տոկոս է։ Ես կարծում եմ, որ մենք մոտավորապես 1.5-1.8 տոկոսի շրջանակներում էլ գնաճ կունենանք տարեվերջին»,– ասաց Ստեփանյանը։
Տարվա ընթացքում դիտարկված հիմնական գնաճը վերաբերել է գյուղատնտեսական շուկային, որտեղ միայն նոյեմբերին, հոկտեմբերի համեմատ շուրջ 20 տոկոս գնաճ է արձանագրվել։ Իսկ հիմնական գնանկումն այս տարի գրանցվել է շաքարավազի ու բանանի շուկաներում։ Վառելիքի շուկան էլ չի արձագանքել միջազգային շուկայի գների բարձրացմանը, ինչն անսովոր է Հայաստանի համար։
«Առաջներում, եթե կհիշեք, նման երևույթներն անմիջապես բերում էին տեղական շուկայում գների բարձրացման և նույնիսկ շատ ավելի երկար էր դա տևում, քան միջազգային շուկայում։ Այս տարի նման բան մենք չտեսանք»,– ասաց Ստեփանյանը։
Ամանորյա գնաճի ահազանգ ԿԲ–ն ևս չի գրանցել։ Սպառողական շուկաներում ամսվա ընթացքում գնային կտրուկ տատանումներ, ըստ ԿԲ պաշտոնյայի, չկան։
«Ես, իհարկե, հիմա չեմ կարող ասել, թե Ամանորին շատ ավելի մոտ ինչ երևույթներ տեղի կունենան շուկաներում։ Բայց դա հաշվի է առնված այն ցուցանիշի մեջ, որը ես նշեցի` 1.5-1.8 տոկոս գնաճ»,– ասաց նա` հավելելով, որ գնաճային ցածր միջավայրը կպահպանվի նաև հաջորդ տարվա առաջին ամիսներին։
Ինչ վերաբերում է հաջորդ տարի կանխատեսվող արժեզրկմանը, ԿԲ խորհրդի անդամը նման լուրերը հիմնազուրկ որակեց` հայտարարելով. «Մեզ ոչ դեֆոլտ է սպասվում, ոչ էլ արժեզրկում»։
Ավելին` ՀՀ ֆինանսական կայունության վրա այս տարի Արթուր Ստեփանյանի խոսքով, դրական ազդեցություն է ունեցել պետական համակարգի ծախսերի կրճատումը, որի արդյունքում տարեվերջին նաև բյուջեի դեֆիցիտի կրճատում է կանխատեսվում։
«Ավելի շատ տնտեսումներ են տեղի ունեցել` և՛ կապիտալ շինարարության, և՛ պետական գնումների մասով»,– ասաց Ստեփանյանը` նշելով, որ թվային տվյալներ հայտնել չի կարող մինչև ֆինանսների նախարարությունը չամփոփի տարին, բայց տարեկան դեֆիցիտի ցուցանիշը նախատեսված 2 տոկոսի փոխարեն տարեվերջին կկազմի 1.3 տոկոս։