ԵՐԵՎԱՆ, 30 նոյեմբերի — Sputnik. Ուզբեկստանի վաստակավոր արտիստ Օբիդ Ասոմովի և Ռուսաստանի վաստակավոր արտիստ Կարեն Ավանեսյանի ելույթը բազմաթիվ վեճերի պատճառ է դարձել երկու հումորիստների պատմական հայրենիքներում։
Ասոմովը Podrobno.uz պարբերականին խոստովանել է, որ հայրենակիցներից շատերը չեն ողջունում «անգրագետ ուզբեկի և հայի» կերպարները։ Նրա խոսքով` մարդիկ շատ բծախնդիր են դարձել, կորցրել են հումորի զգացողությունը, սխալներ ու ենթատեքստ են փնտրում։
«Նույնիսկ Կարենը, որ Բաքվի հայ է, ադրբեջաներեն լավ է խոսում, ելույթ է ունենում և՛ այնտեղ, և՛ Ռուսաստանում։ Դա չի նշանակում, թե Հայաստանը նրան ատում է։ Նա հայ ազգին չի ցուցադրում, ինչպես և ես, ցույց չեմ տալիս ամբողջ Ուզբեկստանը», – նշել է ուզբեկը։
Հիշեցնենք, որ Կարեն Ավանեսյանը ռուսական էստրադայի արտիստ է, կինոդերասան, կոնֆերանսյե, նմանակումների վարպետ, երգիծաբան, Ռուսաստանի վաստակավոր արտիստ։ Հայտնի է վատ ռուսերեն խոսող և «անգրագետ հայի» կերպարով։ Ասոմովի խոսքով` «Հայ և ուզբեկ. 2 ժամ ուրախ ծիծաղ» շոուի իրենց ելույթները դուր չեն գալիս միայն հումորի զգացողություն չունեցողներին։
«Սխալ խոսելը չի նշանակում նեղացնել ազգիդ, չէ՞ որ դրանք հումորի երանգներն են։ Առանց դրա բուն հումորը չի լինի։ Եթե հումորի մասին դատեին ըստ ազգության, ապա Չարլի Չապլինն ու Միստեր Բինն ընդհանրապես չէին լինի, դա կերպար է», – ընդգծել է Ասոմովը։
Նա ասել է նաև, որ ծրագրի վերնագիրը` «Հայ և ուզբեկ. 2 ժամ ուրախ ծիծաղ», հատուկ է մտածվել, որպեսզի ծիծաղելի լինի, քանի որ ո՛չ հայը, ո՛չ էլ ուզբեկը ռուսների պես ռուսերեն չեն խոսում։
Ասոմովը նաև պատասխանել է ուսուցչին ընտրելու հարցում իր հասցեին հնչած քննադատություններին։ Հումորիստը հարցազրույցում բազմիցս պնդել է, որ միշտ օրինակ է վերցրել Եվգենի Պետրոսյանից, բայց ուզբեկ հանդիսատեսին այդ մոտեցումը դուր չի եկել։ Ասոմովի արվեստի երկրպագուները պնդել են, որ անհնար է ուսուցիչ համարել արտասահմանյան մասնագետին, եթե արտիստը սովորել և ստեղծագործել է Ուզբեկստանում։
«Շատ բան եմ սովորել Եվգենի Պետրոսյանից, նույնիսկ ժամանակին նրա մենախոսությունները ուզբեկերեն էի թարգմանում։ Բոլոր խնդիրները, որոնց մասին պատմում ենք բեմից, նույնն են բոլոր ժողովուրդների համար, քանի որ դրանք համամարդկային են։ Այստեղ չկան այնպիսի սահմաններ, ինչպիսին ազգությունն է», – խոստովանել է Ասոմովը։
Երգիծաբանն օրինակ է բերել ջութակահարներին, որոնց համար Պագանինին ուսուցիչ է և կուռք, անկախ նրանից, որ մահացել է մի քանի դար առաջ։