ԵՐԵՎԱՆ, 30 հոկտեմբերի — Sputnik. Վաշինգտոնը Արցախի հարցում ճնշում չի գործադրի Հայաստանի վրա։ Այսօր լրագրողների հետ հանդիպման ժամանակ այս մասին ասաց ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը։
«Բոլտոնի հարավկովկասյան այցի հիմնական նպատակն Ադրբեջանն էր։ Վրաստանի և նրա նկատմամբ տարվող քաղաքականության հարցում ամեն ինչ հասկանալի է։ Վրաստանի դեպքում կարող է միայն խոսվել օգնությունն ավելացնելու մասին։ Հայաստանի նկատմամբ հստակ քաղաքականություն չկա, շարունակվում է այն գիծը, որն ընդունվել էր երկրի անկախացումից հետո։ Բարեկամական, դրական վերաբերմունք է», — ասաց Սաֆրաստյանը։
Հայաստանի հետ հարաբերություններում նոր երանգ հայտնվեց թավշյա հեղափոխությունից հետո, որը դրական էր ընդունվել ԱՄՆ-ում։ Միևնույն ժամանակ ԱՄՆ-ն մտադիր չէ Հայաստանի վրա ճնշում գործադրել Արցախի հարցում։
«Չի նկատվում որևէ ազդանշան, որ ԱՄՆ-ն ԵԱՀԿ ՄԽ-ից տարբերվող ինչ-որ ծրագրեր ունի։ Չեմ տեսնում նաև որևէ նոր մոտեցում, որը թույլ կտար ենթադրել, թե Հայաստանի վրա ճնշում են գործադրելու Արցախի հարցում», — ասաց Սաֆրաստյանը։
Նրա կարծիքով` հազիվ թե Վաշինգտոնը նախաձեռնությամբ հանդես գա ԵԱՀԿ Մինսկի խմբի շրջանակում։
Ինչ վերաբերում է ԱՄՆ նախագահի ազգային անվտանգության հարցերով խորհրդական Ջոն Բոլտոնի` «վճռական քայլերի» մասին հայտարարություններին, ապա, ըստ Սաֆրաստյանի, տարբեր ժամանակահատվածներում այդօրինակ հայտարարություններ հնչեցրել են նաև այլ երկրներ։
Հայաստանում կամ Ադրբեջանում անցկացվող ընտրություններից հետո միշտ բանակցությունների աշխուժացման հույս է հայտնվում։
Ընդհանուր առմամբ` Սաֆրաստյանի խոսքով, դեռ պարզ չէ` տարածաշրջանում ԱՄՆ-ի քաղաքականությունը կփոխվի, թե ոչ։ Օբամայի օրոք Հարավային Կովկասը դիտարկվում էր Ռուսաստանի հետ հարաբերությունների համատեքստում, և Վաշինգտոնը չէր ձգտում այս տարածաշրջանում ակտիվ քաղաքականություն վարել։
«Փոխո՞ւմ է արդյոք Թրամփի վարչակազմն իր քաղաքականությունը տարածաշրջանում։ Այս հարցն անպատասխան մնաց։ Բոլտոնը չցանկացավ պատասխանել այդ հարցին։ Սակայն կոնկրետ ազդանշաններ կան, որ այդ ուղղությամբ քայլեր են արվում», — ասաց Սաֆրաստյանը։
Նրա խոսքով` Թրամփն արդեն մի քանի անգամ 907 բանաձևը չեղարկելու քայլեր է արել։ Եթե ամեն դեպքում գնա այդ քայլին, ապա Ադրբեջանին զենք վաճառելու լայնածավալ գործընթաց կսկսվի։
Միևնույն ժամանակ Բոլտոնը, ինչպես նաև Թրամփի վարչակազմը, դեռ հստակ դիրքորոշում չունի այս հարցում։
«Կարծում եմ`այդ հարցը դեռ քննարկման փուլում է», — ասաց Սաֆրաստյանը։
Ավելի վաղ Բոլտոնը հայտարարել էր, որ ԱԺ ընտրություններում հաղթելուց և վարչապետ ընտրվելուց հետո Նիկոլ Փաշինյանը կարող է վճռական որոշումներ կայացնել Արցախի հարցում: