ԵՐԵՎԱՆ, 21 սեպտեմբերի — Sputnik. ԱՄՆ նախագահ Դոնալդ Թրամփը Հայաստանում ԱՄՆ դեսպանի պաշտոնի համար առաջարկել է Ռուսաստանի և նախկին ԽՍՀՄ-ի գծով մասնագետ Լին Թրեյսիի թեկնածությունը։ Այս մասին հայտնում է ՌԻԱ Նովոստին` հղում անելով Սպիտակ տան մամուլի ծառայությանը։
Նշվում է, որ Թրեյսին այժմ Ռուսաստանի հարցերով ավագ խորհրդական է պետդեպարտամենտում։ Մինչ այդ եղել է Մոսկվայում, Աշխաբադում և Աստանայում ԱՄՆ դեսպանի տեղակալը, Կենտրոնական Ասիայի գծով պետքարտուղարի առաջին փոխօգնականը։ Նա նաև աշխատել է Պակիստանում ԱՄՆ հյուպատոսությունում, ընդ որում` այդ աշխատանքի համար արժանացել է պետքարտուղարի պարգևին։ Թրեյսին ռուսերեն գիտի։
Նրա թեկնածությունը դեռ պետք է հաստատի սենատը։
Նշենք, որ այժմ Հայաստանում ԱՄՆ դեսպանը Ռիչարդ Միլզն է։