Օրերս տեղի ունեցավ ոստիկանության զորքերի պետական սահմանի մարտական հերթապահության առաջին հերթափոխը:
Շարահրապարակում կանգնած ոստիկանները ժամեր անց կփոխարինեն իրենց գործընկերներին ու կշարունակեն մարտական հերթապահությունը:
Նրանց ճանապարհելու հանդիսավոր արարողությանը մասնակցում էր նաև ոստիկանության պետ Վալերի Օսիպյանը:
Ոստիկանության պետը ՀՀ վարչապետի և իր անունից շնորհակալություն հայտնեց ներկաներին ու նրանց ընկերներին ծառայության համար:
Տերունական աղոթքից հետո, թե ժամկետային զինծառայողները և թե ոստիկանները դիրքեր բարձրանալուց առաջ երդվում են անձնվիրաբար պահել պետական սահմանը:
Ինչպես Արցախյան պատերազմին, Ապրիլյան մարտերին, այնպես էլ հիմա խիզախ, ուժեղ ու հպարտ հանդիսավոր երթով սահման են գնում ոստիկանները: Գնում են թև ու թիկունք լինելու դիրքապահ զինվորին ու սահմանապահ գյուղացուն:
Երգ ու պարով գնաց հերթափոխը, իսկ հաջորդ օրը նույն կերպ վերադարձան նրանց զինակիցները:
Ոստիկանության պետը դիմելով ոստիկաններին՝ նշեց, որ նրանք բոլորի հպարտությունն են դարձել: Առաջադրված խնդիրները կատարել են անթերի:
Օսիպյանը մի քանի ծառայողների պարգևատրեց կրծքանշաններով ու պատվոգրերով: Շարքում կանգնած բոլոր ոստիկաններին հայտարարվեց շնորհակալություն, որը կկցվի նրանց անձնական գործերին:
Սահմանից վերադարձած ծառայողները կանցնեն հասարակական կարգի պահպանման գործին՝ սպասելով հրամանի, որ կրկին լինեն արդեն հարազատ դիրքերում: