ԵՐԵՎԱՆ, 6 օգոստոսի — Sputnik. Արդարադատության պատժիչ ձեռքը ՀՀ երկրորդ նախագահին որպես թիրախ ընտրել է մի շարք պատճառներով, որոնցից մեկն այն է, որ Ռոբերտ Քոչարյանը ոչ միանշանակ է ընկալվում հանրության կողմից։ Այս մասին այսօր հրավիրված մամուլի ասուլիսի ժամանակ ասաց քաղտեխնոլոգ Վիգեն Հակոբյանը։
Նա նշեց, որ Քոչարյանն ասոցացվում է հայկական տնտեսության քրեաօլիգարխիկ համակարգի ստեղծման հետ։ Շատերը կարծում են, որ իր նախագահության տարիների ընթացքում նա միլիարդավոր դոլարներ է դիզել։ Իսկ 2008 թվականի մարտի 1-ի ողբերգական ժառանգությունը, չէր կարող անհետ կորել նախկին նախագահի քաղաքական կենսագրությունից։
Նիկոլ Փաշինյանի իշխանության գալուց և նախկին իշխանավորների նկատմամբ աղմկահարույց քրեական գործեր սկսվելուց հետո մի շարք դիտորդներ արդարադատության ընտրողականություն են տեսնում։ Նույն մարտի 1-ի գործով այսօր ուժայինների թիրախի տակ են հիմնականում հայտնվել Քոչարյանն ու իր թիմի անդամները, օրինակ` նախկին փոխվարչապետ Արմեն Գևորգյանը կամ պաշտպանության նախկին նախարար Միքայել Հարությունյանը։
Այստեղ, ինչպես նշեց քաղտեխնոլոգը, այլ հարց է առաջանում. ինչու մինչև օրս ձեռք չեն տվել Քոչարյանին հաջորդած նախագահ Սերժ Սարգսյանին, նրա կառավարության առանցքային պաշտոնատար անձանց, որոնց հասարակությունն ու մամուլը մեղադրել է ոչ օրինական հարստացման, պաշտոնական լիազարությունները չարաշահելու, տնտեսության հիմնական ոլորտները մոնոպոլիզացնելու մեջ։
Հակոբյանը կարծում է, որ նոր իշխանությունը, հավանաբար, բոլորին բռնել չի կարող որոշակի պայմանավորվածությունների պատճառով։
«Օրինակ` այն պայմանավորվածությունների, որոնց մասին հիշատակում էր Ռուսաստանի ԱԳՆ ղեկավար Սերգեյ Լավրովը։ Կարծում եմ, որ Հայաստանում իշխանության հանձնման–ընդունման գործընթացը որոշակի գործարքով է ուղեկցվել։ Եվ այն, որ Քոչարյանի կալանավորումը այդքան կտրուկ արձագանք է առաջացրել Մոսկվայում, անուղղակիորեն հաստատում է այդ գործարքի առկայությունը», – ասաց Հակոբյանը։ Թե որքանով էր Քոչարյանն այն գործարքի մաս կազմում, այլ հարց է։
Հիշեցնենք, որ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը 2008 թվականի մարտի 1-ից 2-ն ընկած ժամանակահատվածում Երևանում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռքբերված ապացույցների բավարար համակցության հիման վրա 2018 թվականի հուլիսի 26-ին ՀՀ պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով, այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։