ԵՐԵՎԱՆ, 23 հուլիսի — Sputnik. Հաշվի առնելով այն մեծ հետաքրքրությունը, որ դրսևորել են համաքաղաքացիները Հայ-չինական բարեկամության դպրոցի կապակցությամբ՝ ՀՀ կրթության և գիտության նախարարը Հովհաննես Հովհաննիսյանը մի քանի հարցեր է պարզաբանել:
Facebook սոցիալական ցանցում նա հիշեցրել է, որ դպրոցը ստեղծվել է նախկինում նույն տարածքում գործող 103 դպրոցի տարածքում, և տվյալ դպրոցի աշակերտները պետք է տեղափոխվեն իրենց դպրոց:
Դպրոցը կարող է տեղավորել 605-610 աշակերտի:
«Եթե այս թվից հանում ենք 103 դպրոցում արդեն առկա աշակերտներին, ապա խոսքը մոտ 400 նոր աշակերտ ընդունելու մասին է»,- գրել է պաշտոնյան:
Նա նշել է, որ դպրոցի իրավակազմակերպական ձևը լինելու է հիմնադրամ և ոչ ՊՈԱԿ, ունենալու է իր հոգաբարձուների խորհուրդը: Այն սովորական հանրակրթական դպրոց է իր ծրագրերով, բացառությամբ միայն, որ դպրոցում լինելու է խորացված չինարեն լեզվի ուսուցում: Դպրոցը չի տրամադրելու տրանսպորտ և սնունդ:
«Դպրոցի 5-9 դասարաններում սովորելու համար դիմել են մոտ 700 աշակերտ, որի համար մենք կազմակերպեցինք հանդիպում ծնողների հետ, որտեղ ծնողները բարձրացրեցին իրենց մտահոգող բոլոր հարցերը ու ստացան պարզաբանումներ: Հիմնական հարցը վերաբերում էր դպրոցի ընդունելությանը, քանի որ փաստ է, որ դպրոցը չի կարող ընդունել բոլոր դիմորդներին: ԿԳՆ հիմնական մոտեցումը հիմնված է սոցիալական հավասարության սկզբունքի պահպանման վրա, երբ բոլոր դիմորդները կունենան հավասար հնարավորություններ»,- նշել է Հովհաննիսյանը:
Նա թվարկել է, թե ընդունելության համար ինչ տարբերակներ են քննարկվել։
- Ընդունելությունը կազմակերպել միջինացված գնահատականներով: Այս տարբերակը ընդունելի չէ, քանի որ հակասում է հանրակրթության մասին օրենքին ու խախտում է հավասարության սկզբունքը՝ հաշվի առնելով այն հանգամանքը, որ տարբեր դպրոցներում միևնույն գնահատականը աշակերտները ստանում են ոչ նույն սկզբունքներով:
- Առավելություն տալ նրանց, ովքեր առաջինն են դիմել: Այս մոտեցումը նորից անհավասար հնարավորություններ կստեղծեր այն ծնողների համար, ովքեր այս կամ այն պատճառով իրեն գործերը հանձնել են ավելի ուշ: Օրինակ բերվեց սահմանում զինծառայողի ընտանիքը, ով հասցրել էր միայն նախավերջին օրը դիմել դպրոցի համար:
- Դպրոցը կազմակերպել երկհերթ տարբերակով: Այս տարբերակը գործնականում հնարավոր չէ իրագործել, քանի որ Հայ-չինական բարեկամության դպրոցում դասարանները նախատեսված են միայն 15 աշակերտի համար, որը հավելյալ ծանրաբեռնվածություն է պետբյուջեի համար, իսկ երկհերթ տարբերակը այդ ծանրաբեռնվածությունը ուղղակի կկրկնապատկի:
- Առաջարկություն եղավ նաև առավելություն տալ արդեն չինարենի իմացությամբ աշակերտներին կամ անցկացնել հարցազրույց, ինչը մերժվեց այն պարզ պատճառով, որ դպրոցի նպատակը հենց չինարենի ուսուցումն է այդ լեզվին չտիրապետող աշակերտների համար, իսկ հարցազրույցը հիմք է տալու ծնողներին մեղադրելու ընդունող հանձնաժողովին սուբյեկտիվության մեջ:
- Ընդունելությունը կազմակերպել վիճակահանությամբ, որը լիովին կապահովի հավասար մոտեցումը բոլոր դիմորդների համար: Վիճակահանությունը կանցկացվի ծնողների ներկայությամբ ու մասնակցությամբ: ԿԳՆ որդեգրած քաղաքականությունն է դպրոցների էլիտարացումը չխթանելը և հավասար հնարավորությունների ստեղծումը բոլոր ՀՀ քաղաքացիների համար, որը հնարավոր է կատարել միայն պատահական ընտրանքով՝ բացառելով բոլոր տեսակի շահարկումներն ու սուբյեկտիվ վերաբերմունքը: