ԵՐԵՎԱՆ, 19 հուլիսի — Sputnik. Դրամահավաքությունը զորամասերում արգելված է և քրեորեն պատժելի։ Sputnik Արմենիայի հետ զրույցում, մեկնաբանելով դիրքեր բարձրանալուց առաջ զինվորների շրջանում դրամահավաքության մասին ահազանգերը, ասաց Արցախի Հանրապետության նախագահի խորհրդական Տիգրան Աբրահամյանը:
Ինչ վերաբերում է մամուլում առկա հրապարակումներին, Աբրահամյանը դրանք շատ ընդհանուր բնույթի հայտարարություններ որակեց` միաժամանակ հիշեցնելով, որ ցանկացած զինվոր առաջնագիծ գնալիս առևտուր անելու և ցանկացած թույլատրելի ապրանք իր հետ դիրքեր տանելու իրավունք ունի (այդ թվում`սնունդ)։
«Օրինակ` զինծառայող կա, որ առաջնագիծ բարձրանալուց առաջ իր համար ծխախոտ կամ, ասենք, 1 կգ վաֆլի է գնում։ Այսինքն տրամաբանությունն անհասկանալի է։ Ի՞նչ է նշանակում` զինվորները դիրքեր բարձրանալուց առաջ փող են հավաքում»,- ասաց Աբրահամյանը։
Այդուհանդերձ, նախագահի խորհրդականը նշեց, որ ցանկացած նման հրապարակում քննության առարկա է դառնում, բայց եթե չկա կոնկրետ փաստ, չկա հասցեականություն, դժվար է կոնկրետ արդյունք ակնկալել։
Աբրահամյանը նշեց, որ զինված ուժերում սոցիալ-կենցաղային խնդիրների մասին հրապարակումները հիմնականում անորոշ են լինում կամ անանուն նամակների տեսքով։ Որևէ խնդիր բարձրաձայնելով` լրատվամիջոցները նշում են, որ անվտանգության նպատակներով տեղեկատվության աղբյուրը չի բացահայտվում։
«Այստեղ ակնհայտ երևում է, որ կեղծ տեղեկատվության արկ է դրված, ու միամտություն է այդպիսի նամակների հրապարակումը։ Ցանկացած բնագավառում կեղծ տեղեկատվության խնդիր կա, բայց հատկապես երբ դա վերաբերում է զինված ուժերին, մեր զինվորներին ու սպաներին, ես կարծում եմ, որ պետք է լինեք առավել զգույշ»,- ասաց Աբրահամյանը` հորդորելով նման լուրերը հրապարակել Հայաստանի կամ Արցախի ռազմական գերատեսչությունների պարզաբանումներով։
«Մինչ մենք հերքում կամ պարզաբանում ենք տալիս, արդեն ուշ է լինում, որովհետև լուրն արդեն շրջանառված է լինում»,- ասաց նա։
Հիշեցնենք` այսօր մամուլում տեղեկություններ են հրապարակվել այն մասին, որ Նոյեմբերյանի զորամասերից մեկում դիրքեր բարձրացող զինվորները նախապես 7-10 հազար դրամ գումար են հավաքում սնունդ գնելու համար: Հրապարակման համաձայն` մի քանի օր դիրքերում մնացող զինվորներին ինչպես հարկն է չեն կերակրում, և ամեն անգամ հերթապահության գնալուց առաջ զինվորները տնից գումար են խնդրում` սնունդ և ծխախոտ գնելու նպատակով: