ԵՐԵՎԱՆ, 17 հուլիսի — Sputnik. Սերժ Սարգսյանի եղբայր Սաշիկ Սարգսյանի որդու՝ Նարեկի դեմ հերթական քրեական գործն է հարուցվել 49-ամյա մի տղամարդու առևանգելու և ծեծի ենթարկելու համար: Ինչպես այս, այնպես էլ նախորդ քրեական գործով շրջանառվում է նաև Նարեկի թիկնապահ Արտեմ Պետրոսյանի անունը: Նարեկը գտնվում է հետախուզման մեջ, իսկ Պետրոսյանը վերջերս ժամանել է Երևան, հանձնվել իրավապահներին:
«Ժողովուրդ» օրաթերթի հետ զրույցում Պետրոսյանի պաշտպան Հովիկ Արսենյանը, սակայն, պնդել է, թե նա որևէ առնչություն չունի արարքի հետ, որում մեղադրվում է:
Ըստ պաշտպան Հովիկ Արսենյանի` Արտեմ Պետրոսյանը իրավապահներին հայտնել է, որ ինքը եղել է Նարեկ Սարգսյանի թիկնապահը և ամեն օր` ժամը 14։00-ին կամ 15։00-ի սահմանում, գնացել է նրա տան բակ և սպասել, թե Նարեկ Սարգսյանը երբ կարթնանա, ուր կգնա, որ ապահովի նրա անվտանգությունը։ Իրավապահները նրանից հետաքրքրվել են, թե ում հետ է հանդիպել Նարեկ Սարգսյանը, ինչ է խոսել, Արտեմ Պետրոսյանը հայտնել է, որ ի զորու չէր տեղեկանալ, թե ում հետ է նա հանդիպում և առհասարակ ինչ է խոսում, քանի որ ըստ Արտեմ Պետրոսյանի, Նարեկ Սարգսյանը ում հետ էլ որ հանդիպել է, նա ընդամենը կանգնել է դրում, ապահովել է նրա անվտանգությունը և այլ բանից տեղյակ չէ։
Պաշտպան Հովիկ Արսենյանի խոսքով` իրավապահներն Արտեմ Պետրոսյանից նաև հետաքրքրվել են, թե կոնկրետ ինչ հանձնարարականներ է նրան տվել Սերժ Սարգսյանի եղբորորդին` Նարեկ Սարգսյանը։
«Կարող եմ ասել, օրինակ, հանձնարարականներից մեկը. Նարեկ Սարգսյանը Արտեմ Պետրոսյանին հանձնարարել է, որ իր համար վարձով բնակարան գտնի, որ ինքը գնա, մնա այդ բնակարանում, բոլորի աչքից հեռու լինի։ Արտեմը նրա համար գտնում է վարձով բնակարան, որի համար վճարում է 300 հազար դրամ։ Նշեմ` երբ Նարեկ Սարգսյանը Արտեմ Պետրոսյանին հանձնարարում է վարձով բնակարան տանել ճամպրուկներ, այդ ժամանակ Արտեմ Պետրոսյանի մեջ կասկածներ են ընկնում, նա հարցնում է Նարեկին, թե ճամպրուկներում զիբիլ-միբիլ չկա։ Նարեկ Սարգսյանն էլ ասում է, թե չէ, չկա, անգամ երդվում է իր երեխայի արևով։ Այս ամենից հետո Արտեմ Պետրոսյանը կատարում է Նարեկ Սարգսյանի հանձնարարականը»։
Ըստ Արսենյանի` Արտեմ Պետրոսյանը պատմել է, որ հունիսի 2-ին Նարեկ Սարգսյանն ասել է, թե պետք է գնա Մոսկվա, և նա պետք է իր հետ լինի։ Գնացել են Մոսկվա, և մի քանի օր անց Արտեմը հեռուստատեսությամբ լսել է, թե ինչ է կատարվում, և իր մասին ինչ են հայտնում իրավապահները: Այս ամենը լսելով` Արտեմ Ասատրյանը վիճում է Նարեկ Սարգսյանի հետ` ասելով, թե այս ինչ պատմության մեջ է իրեն գցել: Վերջիններս վիճաբանում են, որից հետո Արտեմը թողնում, հեռանում է Նարեկ Սարգսյանից: