ԵՐԵՎԱՆ, 19 հունիսի — Sputnik. Հայաստանի Հանրապետական կուսակցության պատգամավոր, գեներալ Մանվել Գրիգորյանին ձերբակալելը և բանակի ունեցվածքը թալանելու մեղադրանքները տակնուվրա են արել հայ հասարակությունը։ Հայաստանը զգացմունքների չլսված պոռկում է ապրում, ինչը հաստատ նոր փոփոխություններ կբերի երկրին։ Sputnik Արմենիան փորձագետների հետ պարզել է, թե ինչպիսին կլինեն այդ փոփոխությունները։
Քաղաքական տեխնոլոգ Վիգեն Հակոբյանի կարծիքով` չնայած նրան, որ Գրիգորյանի վերաբերյալ տեղեկատվությունը շոկային էր, տարբեր տարիներին պարբերաբար մեղադրանքներ են ծագել նրա հասցեին։ Շատերը հավատացել են, որ ի վերջո ամեն ինչ կբացահայտվի։
«Հասարակությունը չի զարմացել, որ լուրջ զինանոց են գտել։ Այստեղ կարևոր է եղել այն բարոյական հարվածը, որ հասարակությունը ստացել է` իմանալով, որ այսպես կոչված «գեներալը» նույնիսկ 2016թ-ի ապրիլին բանակի օգնությունն է ինչ-որ ուղիներով յուրացրել», — ասաց Հակոբյանը։
Նա նշեց, որ նման իրավիճակ եղել է ոչ միայն Էջմիածնում, այլ նաև Հայաստանի այլ քաղաքներում։ Մյուս տեղերում եղել են խոշոր օլիգարխներ, որոշ վայրերում` ուղղակի քրեական տարրեր։ Դա եղել է երկրի գլխավոր խնդիրներից մեկը, և կոռուպցիայի դեմ պայքարն այդ համակարգի դեմ պայքարի կարևորագույն գործիքներից է, կարծում է խոսնակը։
Այդ առումով ցնցող տվյալների հրապարակումից հետո ստեղծված զգացմունքային ֆոնը ոչ միայն նորմալ, այլ նաև դրական երևույթ է, նշեց Հակոբյանը։ Նրա խոսքով` եթե դեռ երկու-երեք ամիս առաջ խոսվել է այն մասին, որ հասարակությունում տիրում է համատարած անտարբերություն, այժմ իրավիճակը փոխվել է։
«Որոշ շրջաններում տիրող ֆեոդալիզմին բնորոշ մտածողության դեգրադացիան դադարել է։ Ֆեոդալիզմը եղել է գլխավոր խնդիրներից մեկը, մարդիկ իրենց ստրուկ են զգացել։ Տեկտոնիկ փոփոխությունների գլխավոր նշանակությունը հասարակության մտածողության փոփոխությունն է։ Դա նշանակում է, որ ֆեոդալիզմը նահանջում է», — ասաց Հակոբյանը։
Ինչպես նշեց քաղտեխնոլոգը, խնդիրը ոչ միայն այս կամ այն «ֆեոդալներին» ձերբակալելն է, այլ նաև այդ մտածողությունն արմատախիլ անելը։
Ինչ վերաբերում է հենց Գրիգորյանին, ապա այդ հարցը դեռ պետք է լուծել խորհրդարանում` հաշվի առնելով այն, որ Գրիգորյանը պատգամավոր է։ Փորձագետը դժվարացավ պատասխանել, թե ՀՀԿ խմբակցությունն ինչ հիմնավորումով կպաշտպանի իր անդամին, քանի որ տեսածը հակափաստարկներ չունի։ Մյուս կողմից, հանրապետականների տոնայնությունը Գրիգորյանի հարցում արդեն փոխվել է։
Նրա կարծիքով` Գրիգորյանին ձերբակալելու ժամանակը պատահաբար չի ընտրվել։ Վարչապետ Նիկոլ Փաշինյանն արդեն հայտարարել է, որ փոխզիջման չի գնա կոռուպցիայի դեմ պայքարում։
Քաղաքագետ Երվանդ Բոզոյանը կարծում է, որ հանրապետականները, տեսնելով հասարակության բուռն արձագանքը, արդեն փորձում են հեռու մնալ Մանվել Գրիգորյանից։ Բայց նրանք հաշվի են առնում կոնկրետ նախադեպերը` շարունակելով օգտագործել մյուս օլիգարխների ռեսուրսները։
«Քանի դեռ չեն բացահայտվել կոնկրետ փաստեր, ՀՀԿ-ն այդպիսի մանրամասների կարիք կունենա, որովհետև իրենց օգնությունը պետք կլինի ընտրությունների ժամանակ։ Հենց ինչ-որ մեկը հայտնվի Գրիգորյանի վիճակում, նրանք միանգամից կհեռանան նրանից», — ասաց Բոզոյանը։
Նրանք արդեն որոշակի քայլեր են արել այդ ուղղությամբ։ Օրինակ` խմբակցությունից հանել են խոշոր գործարարներ Արտակ Սարգսյանին, Սամվել Ալեքսանյանին։ Բոզոյանի խոսքով` հանրապետականները շատ ճկուն կգործեն։
Քաղաքագետի կարծիքով` «ֆեոդալիզմի» վախճանը կախված կլինի ընտրական համակարգից, իշխանությունների քաղաքական կամքից, նոր բիզնես էլիտա ստեղծելու մտքից հրաժարվելուց։
Նրա խոսքով` հասարակությունը պահանջում է շարունակել հետաքննությունները` չսահմանափակվելով պատգամավորներով։ Մարդիկ ուզում են, որ իրավապահ մարմինները ստուգեն այն մարդկանց, որոնք ավելի բարձր պաշտոններ են զբաղեցնում, ընդհուպ մինչև երկրի բարձրագույն ղեկավարություն։
«Բոլորը հասկանում են, որ առանց վերևների թույլտվության Մանվել Գրիգորյանը և նրա նմանները չէին կարող գոյություն ունենալ։ Դժվար է ասել, թե հետագայում ինչ կանի իշխանությունը, բայց հասարակությունում նման պահանջ կա», — ասաց Բոզոյանը։