Խաչիկ Չախոյան, Sputnik.
Բարձրագույն խմբի առաջնությունում Գյումրու «Շիրակը» հավակնում էր չեմպիոնական տիտղոսի ու մրցաշրջանի ավարտից երեք տուր առաջ երեք միավորի առավելություն ուներ «Ալաշկերտի» նկատմամբ: Բայց 27-րդ տուրում «Բանանցին» հաղթելուց հետո գյումրեցիները երկար չուրախացան: Պարզվեց, որ պայմանավորված խաղ անցկացնելու փորձ է եղել:
Հայաստանի ֆուտբոլի ֆեդերացիայի կարգապահական կոմիտեն, ի գիտություն ընդունելով «Բանանցի» պաշտպան Էդվարդ Կպոդոյի փոխանցած տեղեկությունը, անհերքելի փաստեր է ստացել, որ «Շիրակի» մարզական տնօրեն Արարատ Հարությունյանը փորձել է կաշառել Կպոդոյին այդ խաղում գյումրեցիների համար նպաստավոր արդյունքի հասնելու համար, ցմահ որակազրկեց Արարատ Հարությունյանին, «Շիրակը» տուգանվեց 7մլն դրամով, և Գյումրու թիմից հանվեց 12 միավոր:
Այսինքն «Շիրակը» առաջատարի դիրքից նահանջեց չորրորդ հորիզոնական` հայտնվելով սկանդալի կենտրոնում: Իհարկե պայմանավորված խաղերի գործոնը ոչ թե ստվեր, այլ սև բիծ է բերում մեր ֆուտբոլի վրա: Եվ այս չարիքի դեմ առնելու համար հարկավոր են համապատասխան քայլեր: Ու այդ քայլը եղավ կարգապահական կոմիտեի որոշումը, ինչի հետ համաձայն չեն «Շիրակ» ակումբում:
Ըստ «Շիրակի» ղեկավարության` Արարատ Հարությունյանը գործել է սեփական նախաձեռնությամբ` տեղյակ չպահելով ակումբին իր որոշումների մասին: Եվ հետևաբար պատիժ պետք է կրի միայն Հարությունյանը, այլ ոչ թե թիմն ու բոլոր ֆուտբոլիստները: Եվ ակումբը պաշտոնապես հայտարարեց. որ Հայաստանի ֆուտբոլի ֆեդերացիան որևէ փաստ չունի, որ «Շիրակը» ներգրավված է եղել նման առաջարկ ներկայացնելու որևէ գործընթացում և ՀՖՖ որոշումը ապօրինի է։
Բացի այդ, Գյումրու ակումբը տեղեկացրեց, որ եթե իր բողոքարկման ընթացքում ՀՖՖ-ն ապօրինաբար կիրառի սույն որոշումը, ապա «Շիրակ» ֆուտբոլային ակումբը՝ բոլոր թիմերով, պարտադրված կլինի լքել բոլոր առաջնությունները:
Հավելենք, որ կարգապահական կոմիտեն առաջնորդվել է կանոնակարգով, և դրանից դուրս ոչ մի որոշում չի կայացվել: Սակայն հիմա արդեն այլ հարց է կարևոր դառնում: Դժվար է պատկերացնել, որ Ֆեդերացիայի կարգապահական կոմիտեն կհրաժարվի իր որոշումից (չնայած չի կարելի բացառել, որ բանակցությունների ընթացքում ամեն ինչ կարող է և փոխվել): Բայց փաստն այն է, որ «Շիրակը» կարող է լքել մեր առաջնությունը, և մրցաշրջանը կավարտեն 5 թիմեր, ինչն արդեն իսկ մեծ հարված է մեր առաջնության հեղինակությանը: Առանց «Շիրակի» դժվար է պատկերացնել մեր առաջնությունը, բայց մյուս կողմից էլ կա օրենք, և բոլոր թիմերը պետք է հավասար լինեն այդ օրենքի առջև: Իսկ այն, որ բոլոր միջոցներով պետք է պայքարել պայմանավորված խաղերի դեմ, կասկածից վեր է:
Պարզապես այս իրավիճակում պայմանավորված խաղ չի եղել, այլ եղել է դրա կազմակերպելու փորձ: Բայց միևնույնն է` «Շիրակի» նկատմամբ արդեն համապատասխան որոշում է կայացվել, ու տուժել է ոչ միայն Արարատ Հարությունյանը, այլ նաև ամբողջ թիմը: Իսկ եթե «Շիրակը» դուրս գա առաջնությունից, կտուժի ոչ միայն Շիրակի մարզը, այլ Հայաստանի առաջնությունը:
Ֆուտբոլում պայմանավորված խաղեր անցկացնելու բազմաթիվ օրինակներ կան: Ճանաչված ակումբներ են տուժել այս ոչ ցանկալի երևույթի պատճառով: Ժամանակին իտալական «Յուվենտուսը» այդ պատճառով հեռացվեց Ա սերիայից ու մեկ մրցաշրջան հանդես եկավ ցածր լիգայում: Հայաստանում էլ մի քանի տարի առաջ պայմանավորված խաղեր անցկացնելու համար ազատազրկվեցին «Ուլիսի» և՛ ֆուտբոլիստներ, և՛ մարզիչներ: Հուսանք, որ ՀՖՖ-ի ու «Շիրակի» միջև կհամաձայնեցվի մի վերջնական որոշում, որը հնարավորություն կտա մրցաշրջանը ավարտել այն կազմով, որով մեկնարկել է: