ԵՐԵՎԱՆ, 7 ապրիլի — Sputnik. Հոնկոնգցի կամավորները սանիտարական մաքրման աշխատանքներ են իրականացրել «Զվարթնոց» արգելոց-թանգարանի տարածքում: Այս մասին հայտնում է «Պահպանության ծառայություն» ՊՈԱԿ-ի լրատվության բաժինը։
12 կամավորները Հոնկոնգից Հայաստան են ժամանել ՅՈՒՆԵՍԿՕ-ի «Պատրիմոնիտո 2018» ծրագրի շրջանակում։ «Զվարթնոց» պատմամշակութային արգելոց-թանգարան ապրիլի 2-6-ը հյուրընկալել է հայ-հոնկոնգյան առաջին միջազգային կամավորական ճամբարի մասնակիցներին:
Տարբեր մասնագիտություններ և հետաքրքրություններ ունեցող 26-37 տարեկան երիտասարդների առաջին էքսկուրսիան անցկացվել է «Զվարթնոց» պատմամշակութային արգելոց-թանգարանի տարածքում:
Հոնկոնգից ժամանած երիտասարդներից շատերն առաջին անգամ են Հայաստանում: Նրանց գրավել է հայկական հյուընկալությունը, մեր լեռնային երկիրը, կլիման, ճարտարապետությունը, պատմամշակութային հուշարձանները։ Հայաստանը տեսնելու ու նրա գեղեցկությամբ հիանալու համար կամավորների մի մասը ծրագրից մի քանի օր շուտ էին ժամանել, մյուսները բացը կլրացնեն և Հայաստանն իրենց համար կբացահայտեն առաջիկա օրերին: Նրանք կլինեն պատմամշակութային մի շարք հուշարձանների տարածքներում:
Հոնկոնգցի երիտասարդները հայկական մշակութային ժառանգության մասին արդեն իսկ ունեն վառ տպավորություններ: Նրանք եղել են «Գառնի» պատմամշակութային արգելոց թանգարանում, Գեղարդում, Մայր Աթոռ Սուրբ Էջմիածնում, Մատենադարանում, Հայաստանի պատմության թանգարանում։
Միջազգային կամավորական ճամբարի ղեկավար Լիլիթ Գևորգյանի փոխանցմամբ` բազմաթիվ միջոցառումներից մասնակիցներին տպավորել էին հատկապես հայկական և չինական խոհանոցների օրերը։
Նախ ճամբարի հայ կամավորները հյուրերին ծանոթացրել են խաղողի տերևով պատրաստվող հայկական տոլմայի ու խորովածի գաղտնիքներին, ապա միասին պատրաստել ու համտեսել են ուտեստները:
Հայ կամավորներից հետ չեն մնացել նաև հոնկոնգցի երիտասարդները։ Նրանք պատմել են իրենց ազգային խոհանոցի մասին, ապա Հոնկոնգից բերած համեմունքներով «Կպչուն բրնձով սալյամի» և բրնձի ալյուրից պատրաստած գնդիկներով քաղցր արգանակ են եփել:
«Այսօր ամփոփել ենք ճամբարից ստացած տպավորությունները։ Հոնկոնգցի կամավորները, որոնց թվում նաև ճամբարի կազմակերպման գործում փորձ ունեցող երիտասարդներ կան վառ տպավորություններով են մեկնում մեր երկրից: Նրանք վստահեցրել են, որ հաջորդ անգամ Հայաստան կգան իրենց ընկերների հետ», —ասել է ճամբարի ղեկավար Լիլիթ Գևորգյանը։
Ճամբարի ավարտին «Պատրիմոնիտո 2018թ.» ծրագրի մասնակիցներին պատվոգրեր են հանձնվել: