ԵՐԵՎԱՆ, 21 փետրվարի — Sputnik. Երևանի քաղաքապետ Տարոն Մարգարյանը փետրվարի 19-ին հանձնարարել է Երևանի քաղաքապետարանի վարչական շենքերում լրագրողների աշխատանքը կանոնակարգելու մասին առաջարկություններ ներկայացնել։ Անահիտ Բախշյանը Sputnik Արմենիայի հետ զրույցում որոշ գաղտնիքներ է բացել` քաղաքապետարան լրագրողների մուտքն ապահովելու մասին։
Քաղաքապետի հանձնարարականը մասնագիտական շրջանակների լայն քննարկմանն է արժանացել` որակվելով որպես լրագրողների մասնագիտական օրինական գործունեությունը խոչընդոտելու փորձ:
Երևանի ավագանու «Ելք» խմբակցության անդամ Անահիտ Բախշյանն այս թեմայի շուրջ Sputnik Արմենիայի հետ զրույցում իր մտահոգությունը հայտնեց քաղաքապետի հանձնարարականի վերաբերյալ` միաժամանակ, սակայն, հավելելով, որ այդ կառույցում լրագրողների աշխատանքն առանց այդ էլ անխոչընդոտ չէ։
«Քաղաքապետարանի աշխատանքները լուսաբանող լրագրողները հավատարմագրված են քաղաքապետարանում։ Դա նշանակում է, որ այդ լրագրողը, ցանկացած պահի, հատկապես ավագանու անդամի հրավերով, իրավունք ունի մուտք գործել քաղաքապետարան, և որևէ մեկն իրավունք չունի խոչընդոտել։ Լրագրողը ոչ միայն իրավունք ունի, այլև պարտավոր է ավագանու հրավերով լինել այնտեղ»,– ասաց նա։
Բախշյանը հիշում է, որ որպես նախորդ գումարման ավագանու անդամ, ինքը երբեք խնդիր չի ունեցել քաղաքապետարան լրագրող հրավիրելու։ Ընդամենը շենքի մուտքը հսկող անվտանգության աշխատակիցներին տրամադրել է իր հրավիրած լրագրողների անուն–ազգանունները, որպեսզի նրանց թույլ տան մտնել շենքի տարածք և ուղեկցեն իր աշխատասենյակ։ Այժմ իրավիճակը, տիկին Բախշյանի խոսքով, փոխվել է։ «Հունիսից հետո մենք հայտնաբերեցինք, որ, եթե ավագանու անդամը զանգահարում է, բավական չէ։ Հիմա ոչ թե ավագանու անդամը, այլ միայն խմբակցության քարտուղարը պետք է դիմի քաղաքապետարանի լրատվության ղեկավարին` Արթուր Գևորգյանին, նրանից թույլտվություն վերցնի, որպեսզի հանդիպենք լրագրողի հետ»,– ասաց Բախշյանը։
Դեռ անցյալ տարի, նոյեմբերի 11-ին Անահիտ Բախշյանը գրավոր հարցմամբ դիմել էր քաղաքապետարանի աշխատակազմին` պահանջելով վերոհիշյալ գործընթացն ամրագրող կանոնակարգը, բայց պատասխան չէր ստացել։ Մինչ օրս անպատասխան է մնացել նաև հունվարին կրկնակի ուղարկված հարցումը։
«Քաղաքապետարանի աշխատակազմն ընդհանրապես չի պատկերացնում` ինչ է նշանակում աշխատել թափանցիկ ու չեն հասկանում, որ առանց լրատվամիջոցի այսօր որևէ կառույց չի կարող աշխատել թափանցիկ ու հրապարակային»,– նշեց Անահիտ Բախշյանը։
Հիշեցնենք` փետրվարի 19-ին, այն բանից հետո, երբ Երևանի ավագանու «Երկիր ծիրանի» խմբակցության ղեկավար Զարուհի Փոստանջյանը, առանց լրատվության պատասխանատուի թույլտվության, քաղաքապետարան էր հրավիրել լրագրողների, քաղաքապետ Տարոն Մարգարյանը քաղաքապետարանի աշխատակազմին հանձնարարել էր առաջարկություններ ներկայացնել Երևանի քաղաքապետարանի վարչական շենքերում լրագրողների աշխատանքը կանոնակարգելու մասին։