ԵՐԵՎԱՆ, 8 փետրվարի — Sputnik, Անի Լիպարիտյան. «Զվարթնոց» օդանավակայանի հին կլոր շենքը քանդելու ծրագիրը ամպրոպի ազդեցություն ունեցավ Հայաստանի բնակիչների համար։ Շինությունն ապամոնտաժելը «Արմենիա միջազգային օդանավակայաններ» կոնցեսիոներ ընկերության ծրագրերի մի մասն է։ Այդ ծրագրերն օրեր առաջ ներկայացրել է Քաղավիացիայի գլխավոր վարչությունը (ՔԱԳՎ)։ Կոնցեսիոների գլխավոր ծրագիրը միտված է 2018-2022 թվականներին «Զվարթնոց» միջազգային օդանավակայանի զարգացման ճանապարհային քարտեզի ստեղծմանը։
Ամենայն հավանականությամբ փաստաթուղթը կքննարկվի մինչև փետրվարի 10-ը, որից հետո այն հաստատման համար կուղարկեն կառավարություն։ Միևնույն ժամանակ ճարտարապետները «Զվարթնոցի» հին շենքը պահպանելու բազմաթիվ տարբերակներ են առաջարկում, իսկ փորձագետները համոզված են` նոր օդանավակայան կառուցելու համար տասն անգամ ավելի շատ միջոց կպահանջվի, քան հին շենքը պահպանելու։
Ոչ մի անձնական բան, սա պարզապես բիզնես է
Ճարտարապետ Անահիտ Թարխանյանը` հայտնի ճարտարապետ Արթուր Թարխանյանի դուստրը, Sputnik Արմենիային տված հարցազրույցում հայտնեց, որ «Զվարթնոցի» հին շենքը քանդելն անիմաստ է։ Նրա խոսքով` Հայաստան եկող զբոսաշրջիկները ցանկանում են տեսնել (խորհրդային) մոդեռնիզմի ժամանակաշրջանի կառույցներ, ինչպիսին օդանավակայանի կլոր շենքն է։
«Օրեր առաջ Հայաստանում զբոսաշրջության զարգացմամբ զբաղվող մի կնոջ հետ էի զրուցում։ Նա սարսափած զանգահարել էր ինձ և ասում էր. «Հուլիսին մենք զբոսաշրջիկների մեծ խումբ ենք սպասում։ Հայտնի ճարտարապետներ են Շվեյցարիայից և Նիդեռլանդներից։ Ի՞նչ անեմ հիմա։ Ցուցակից ջնջե՞մ օդանավակայանը», – պատմեց Թարխանյանն` ավելացնելով, որ շենքը քանդելու թեման բավական զգայուն է։
Թարխանյանը դժվարացավ պատասխանել այն հարցին, թե ինչու է հենց վերջին ժամանակաշրջանում որոշվել քանդել շենքը։ Նրա խոսքով` ամենայն հավանականությամբ նրանք, ում ձեռքում կենտրոնացած է իշխանությունը, համապատասխան կրթություն և դաստիարակություն չունեն, նաև չգիտեն, թե ինչ է մշակույթը։
«Օրինակ, պետք է տարբերել Մինաս Ավետիսյանի կտավներն այն կտավներից, որոնք վաճառվում են Վերնիսաժում։ Ես չեմ ուզում վիրավորել այնտեղ իրենց նկարները վաճառող արվեստագետներին։ Նրանց թվում կան նաև լավ վարպետներ, սակայն դրանց մեջ քիչ չեն նաև անորակ գործերը, ոչ ոք դա հերքել չի կարող», – նշեց Sputnik Արմենիայի զրուցակիցը։
Նրա խոսքով` քանդելն ամենահեշտն է։ Թարխանյանը նաև հիշեցրեց հայտնի ասացվածքը` «քանդելը` կառուցել չէ»։ Իրականում մեծարժեք ճարտարապետական շինություն կառուցելը, որը կհամապատասխանի տվյալ միջավայրին, իսկապես բարդ գործ է։
Թարխանյանը համոզված է, որ պետք է հարգել ժողովրդի, հասարակության կարծիքը։ Նրանք դեմ են օդանավակայանի կլոր շենքը քանդելու գաղափարին։
Լքված, սակայն պիտանի
Ճարտարապետը համոզված է, որ Հայաստանում մոռացված ու լքված ամեն շենք չէ, որ հին ու խարխուլ է, բոլոր այդ շենքերը կառուցված են անվտանգության և կառուցապատման չափանիշների պահպանմամբ։
«Խորհրդային տարիներին օդանավակայանի շենքը նախագծվել է որպես հատուկ նշանակության օբյեկտ։ Այն նախագծվել էր 9 բալանոց երկրաշարժին դիմանալու հաշվարկով, իսկ շենքի հիմքը դնող կառուցապատողները 1,5 բալով ավելացրին պաշտպանության գործակիցը։ Եվ այժմ նրանք հայտարարում են, թե իբր շենքի հետագա շահագործումն անհնար է», – ասաց Թարխանյանը։
Sputnik Արմենիայի զրուցակիցը նշում է, որ շենքի ճարտարապետները, այդ թվում նրա հայրը` Արթուր Թարխանյանը, նման շինություններն ապագայի համար էին կառուցում։
«Նրանք պահուստային տարածքներ էին կառուցում։ Եթե ճիշտ եմ հիշում, օդանավակայանի հին շենքը 14 օդանավ կարող էր ընդունել, իսկ նոր նախագծի համաձայն` միայն 10-12 օդանավ կկարողանա ընդունել», – ընդգծեց հայտնի ճարտարապետի դուստրը։
Անահիտ Թարխանյանը հավաստիացնում է, որ կոնցեսիոների պարտականությունների մեջ ի սկզբանե մտնում էին ոչ միայն հին կառույցի պահպանությունը, այլև այն լավ վիճակում պահելը, արդիական սարքավորումներով համալրելը և ոչ միայն։
Թարխանյանը հավելեց, որ նոր օդանավակայանի կառուցումը սեփականատիրոջ համար տասն անգամ ավելի թանկ կարժենա, քան հնի պահպանումը։ Ճարտարապետը համոզված է` եթե շենքը քանդեն, ապագա Հայաստանի բանալիները մասնավորի ձեռքում կհայտնվեն, իսկ թե ում նա կփոխանցի այդ բանալիները` խնդրահարույց հարց է։