ԵՐԵՎԱՆ, 16 հունվարի — Sputnik. Արմավիրի մարզի Շամիրամ գյուղի հոգեհանգստի սրահում 4 անձի մահվան և 7 անձանց հրազենային վնասվածքներ պատճառելու փաստով քրեական գործի նախաքննությունն ավարտվել է։ Հայտնում է ՀՀ քննչական կոմիտեն։
Մեղադրանք է առաջադրվել 2 անձի` 1967թ. ծնված Թելման Քալաշյանին ու նրա հորեղբորը, որի ինքնությունը ՔԿ–ն չի բացահայտում։
Նախաքննության ընթացքում պարզվել է, որ 2012-2013 թվականների ընթացքում Քալաշյանը, իր բարեկամ Գերման Քյարամյանի խնդրանքով և միջնորդությամբ, պարտքով` տոկոսով 75 000 ԱՄՆ դոլար գումար է տվել ՌԴ–ում բնակվող Քյարամյան եղբայրներին: Պայմանավորվածության համաձայն՝ եղբայրները մաս-մաս վերադարձրել են 45.200 ԱՄՆ դոլարը, սակայն հետագայում իրենց ձեռնարկած առևտրային գործունեությունը ձախողելու պատճառով չեն կարողացել վճարել ո՛չ տոկոսադրույքները, ո՛չ էլ մայր գումարի մնացած մասը։
Պարտատերը, չընդունելով պարտապանների պատճառաբանությունները, պարբերաբար դիմել են Քյարամյանների բարեկամներին և ընկերներին, այդ թվում՝ միջնորդին՝ ակնկալելով նրանց միջամտությունը գումարը հետ ստանալու հարցում։
Հերթական անգամ՝ 2017 թվականի օգոստոսի 1-ի առավոտյան, Թելման Քալաշյանը զանգահարել է Գերման Քյարամյանին ու պահանջել, որպեսզի եղբայրները վերադարձնեն իր գումարը։ Խոսակցությունը վերածվել է վիճաբանության, հնչել են փոխադարձ հայհոյանքներ։
Ապա, տեղեկանալով, որ Գերման Քյարամյանն ու Քյարամյան ընտանիքի հինգ եղբայրների բարեկամներն ու ընկերներն այդ պահին գտնվում են Շամիրամ գյուղի գերեզմանատանը կից սգո սրահում և մասնակցում են եզդիների՝ «Խեր» ազգային ծիսակատարությանը, գնացել է այնտեղ, հրազենով մուտք գործել սրահ, հայհոյել և կրակոցներ արձակել սրահում գտնվողների ուղղությամբ` միաժամանակ փորձելով նրանց մեջ գտնել Գերման Քյարամյանին:
Դեպքից հետո Թելման Քալաշյանը դիմել է փախուստի։ Սրահում կատարվածի ականատեսներից մեկը հետապնդել է նրան` փորձելով բռնել, բայց Քալաշյանը փախուստի ընթացքում շարունակել է կրակել հետապնդողի ուղղությամբ` բարեբախտաբար վրիպելով։
Նախաքննությամբ պարզվել է, որ Քալաշյանին փախչելու հարցում օգնել է նրա հորեղբայրը, ով ևս գտնվել է սգո սրահում:
Բացի այդ, քրեական գործի նախաքննության ընթացքում Թելման Քալաշյանը կեղծ ցուցմունք է տվել այն մասին, թե 3 հոգի իրեն ծեծի են ենթարկել, ինչի արդյունքում էլ ինքը կրակոցներ է արձակել:
Թելման Քալաշյանը կալանավորված է։ Քրեական գործն ուղարկվել է դատախազություն և առաջիկայում կհասնի դատարան։
Նշենք, որ Թելման Քալաշյանը հայտնաբերվել ու ձերբակալվել էր միայն հանցագործությունից 25 օր անց։
Այդ ընթացքում ոստիկաններն օր ու գիշեր ուժեղացված հսկողություն էին իրականացնում Շամիրամ գյուղի տարածքում։