ԵՐԵՎԱՆ, 9 մայիսի – Sputnik. Ռուսաստանը Հայրենական մեծ պատերազմում հաղթողներին երբեք չի բաժանել յուրայինների և օտարների։ Կրեմլում օտարերկրյա հյուրերի համար կազմակերպված հանդիսավոր ընդունելության ժամանակ հայտարարել է Վլադիմիր Պուտինը։
«Մենք հարգում ենք հակահիտլերյան կոալիցիայի բոլոր մարտիկների ներդրումը։ Մեր ժողովուրդներին միավորում են ընդհանուր պատմության նկատմամբ անկեղծ վերաբերմունքը, հիշատակը նրանց մասին, ովքեր պայքարել են իրենց երկրի և ողջ մարդկության ազատության համար, ինչպես նաև պատասխանատվությունը՝ պահպանելու ճշմարտությունը Հայրենական մեծ պատերազմի, Երկրորդ համաշխարհային պատերազմի մասին», - ասել է Ռուսաստանի նախագահը։
Նա նաև բաժակ է բարձրացրել հաղթողների սերնդի և երկրների ու ժողովուրդների բարեկամության համար:
«Թույլ տվեք կենաց առաջարկել հաղթողների սերնդի, ճշմարտության և արդարության հաղթանակի, երկրների և ժողովուրդների բարեկամության և բարգավաճման համար։ Շնորհավոր ձեր տոնը, սիրելի՛ ընկերներ: Շնորհավո՛ր Հաղթանակի օրը»,- ասել է երկրի ղեկավարը։
Դիմելով Մոսկվա ժամանած օտարերկրյա հյուրերին՝ Պուտինը հավելել է` ուրախ է Մայիսի 9-ը ընկերների շրջապատում նշելու համար:
Հայրենական մեծ պատերազմում տարած հաղթանակի 81-րդ տարեդարձին մասնակցելու նպատակով Մոսկվա են մեկնել Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ-Ժոմարտ Տոկաևը, Ուզբեկստանի նախագահ Շավքաթ Միրզիյոևը, Աբխազիայի նախագահ Բադրա Գունբան, Հարավային Օսեթիայի նախագահ Ալան Գագլոևը:
Օտարերկրյա հյուրերի թվում են նաև Լաոսի նախագահ Տխոնգլուն Սիսուլիտը, Մալայզիայի գերագույն կառավարիչ, սուլթան Իբրահիմը, Սլովակիայի վարչապետ Ռոբերտ Ֆիցոն, Սերբական Բոսնիա և Հերցեգովինայի Հանրապետության նախագահ Սինիշա Կարանը, Սերբական Հանրապետության ժողովրդական սկուպշչինայի նախագահ Նենադ Ստևանդիչը և Սերբական Հանրապետության «Անկախ սոցիալ-դեմոկրատների միություն» կուսակցության նախագահ Միլորադ Դոդիկը: