Մեր գործը չէ, բայց տրամաբանական կլիներ հանրաքվե անել․ Պուտինը՝ Հայաստանի ընտրության մասին

ԵՐԵՎԱՆ, 9 մայիսի – Sputnik․ ՌԴ նախագահ Վլադիմիր Պուտինը կարծում է, որ թե՛ ՀՀ քաղաքացիների, թե՛ Մոսկվայի՝ գլխավոր տնտեսական գործընկերոջ հանդեպ ճիշտ կլիներ, որ պաշտոնական Երևանը հնարավորինս արագ կողմնորոշվեր ԵՄ-ին անդամակցելու հարցում։ ՌԴ նախագահն այդ մասին ասաց այսօր ասուլիսի ժամանակ՝ պատասխանելով լրագրողների հարցերին։

ՌԴ նախագահի խոսքով` Հայաստանի ծրագրերը հատուկ քննարկում են պահանջում, ինքը դա բազմիցս քննարկել է վարչապետ Նիկոլ Փաշինյանի հետ:

«Ես նրան մի քանի անգամ ասել եմ և հիմա հրապարակավ ասում եմ՝ մենք աջակցում ենք այն ամենին, ինչը ձեռնտու է հայ ժողովրդին։ Մենք հայ ժողովրդի հետ առանձնահատուկ հարաբերություններ ունենք... Եթե հայ ժողովրդին ձեռնտու է այս կամ այն որոշումը, մենք դեմ չենք լինի։ Բայց, իհարկե, պետք է նկատի ունենալ որոշ հանգամանքներ, որոնք կարևոր են և՛ մեզ, և՛ մեր գործընկերների համար», – ասաց Պուտինը` հավելելով, որ այդ հարցը կարելի է բարձրացնել ԵԱՏՄ առաջիկա գագաթնաժողովում։

ՌԴ նախագահը նշեց՝ թեպետ Հայաստանի և Ռուսաստանի միջև առևտրաշրջանառությունը նվազել է և 2025թ․ կազմել է 7 միլիարդ դոլար, բայց, հաշվի առնելով այն հանգամանքը, որ Հայաստանի ՀՆԱ-ն 29 միլիարդ դոլար է, ըստ Պուտինի, սա բավականին մեծ ցուցանիշ է։
ՌԴ նախագահը նաև հիշեցրեց, որ Հայաստանը՝ որպես ԵԱՏՄ անդամ, զգալի առավելություններ է ստանում մի շարք ոլորտներում, այդ թվում՝ գյուղատնտեսության, վերամշակող արդյունաբերության, մաքսային վճարների, միգրացիայի և այլն։

Հիշեցնենք` 2025 թվականի մարտի 26-ին Հայաստանի ԱԺ–ն երկրորդ և վերջնական ընթերցմամբ ընդունեց ԵՄ-ին անդամակցելու գործընթաց սկսելու մասին օրինագիծը, որը բազմաթիվ տարաձայնությունների պատճառ դարձավ:

Այս տարվա ապրիլի 1-ին Նիկոլ Փաշինյանի հետ հանդիպման ժամանակ ՌԴ նախագահ Վլադիմիր Պուտինը նշեց, որ Հայաստանի միաժամանակյա անդամակցությունը ԵՄ-ին և ԵԱՏՄ-ին անհնար է:

Ավելի ուշ ՌԴ փոխվարչապետ Ալեքսեյ Օվերչուկը հայտարարեց` Հայաստանը շատ մոտ է այն կետին, որից հետո Ռուսաստանը ստիպված կլինի այլ կերպ կառուցել ՀՀ–ի հետ տնտեսական հարաբերությունները: