ԵՐԵՎԱՆ, 8 մայիսի – Sputnik. Ուկրաինական զինուժը հարձակվել է Ռուսաստանի մարզերի վրա՝ խախտելով ՌԴ նախագահ Վլադիմիր Պուտինի հայտարարած հրադադարը: ՌԴ պաշտպանության նախարարությունը հայտնում է, որ օրվա սկզբից ի վեր ՀՕՊ միջոցներն արդեն խոցել են ավելի քան 260 ուկրաինական անօդաչու թռչող սարք:
Լիպեցկի մարզի Ելեց քաղաքում տան վրա ԱԹՍ-ի հարվածի հետևանքով 9 տարեկան երեխա է վնասվածքներ ստացել։
Հակառակորդը նաև փորձել է հարվածներ հասցնել Պերմի երկրամասի արդյունաբերական օբյեկտներին: Ըստ նախնական տեղեկությունների՝ զոհեր չկան:
Ռոստովի մարզի Չալտիր գյուղում ԱԹՍ–ների բեկորների ընկնելու հետևանքով 20 առանձնատուն է վնասվել: Վնասված շենքեր կան նաև Տագանրոգում, Բատայսկում և Դոնի Ռոստովում:
Միևնույն ժամանակ Ռուսաստանի տրանսպորտի նախարարությունը հայտնել է, որ Ռուսաստանի հարավի 13 օդանավակայաններ դադարեցրել են աշխատանքը՝ աերոնավիգացիայի վարչական շենքին ԱԹՍ-ի հարվածի պատճառով: Խոսքը վերաբերում է Աստրախանին, Վլադիկավկազին, Վոլգոգրադին, Գելենջիկին, Գրոզնիին, Կրասնոդարին, Մախաչկալային, Մագասին, Միներալնիե Վոդիին, Նալչիկին, Սոչիին, Ստավրոպոլին և Էլիստային: Անձնակազմը չի տուժել, մասնագետները ստուգում են սարքավորումները:
Ռուսաստանի հայտարարած հրադադարի պահից ի վեր Ուկրաինայի ԶՈւ-ն 1365 անգամ խախտել է կրակի դադարեցման ռեժիմը հատուկ ռազմական գործողության գոտում: Ինչպես նշում են ՊՆ-ում, ՌԴ ԶՈւ-ն հայելային արձագանքել է հրադադարի խախտումներին՝ պատասխան հարվածներ հասցնելով Ուկրաինայի ԶՈւ-ի կրակային դիրքերին և թիրախավորելով ԱԹՍ-ների արձակման վայրերը:
Հիշեցնենք` մայիսի 8-ից սկսվել է հրադադարը, որը Ռուսաստանի նախագահ Վլադիմիր Պուտինը հայտարարել է Հաղթանակի օրվա տոնակատարության կապակցությամբ: Այն կտևի մինչև մայիսի 10-ը։ Այդ ընթացքում ռուսական կողմը հարվածներ չի հասցնի Ուկրաինայի զինված ուժերի տեղակայման վայրերին և ռազմարդյունաբերական համալիրի հետ կապված օբյեկտներին։
Մայիսի 7-ին Ուկրաինայի առաջնորդ Վլադիմիր Զելենսկին սպառնացել է հարվածել Մոսկվայի շքերթին։ Ռուսաստանի պաշտպանության նախարարությունը զգուշացրել է, որ տոնակատարությունները խափանելու ցանկացած փորձ արձագանք կստանա, և զինվորականները կպատասխանեն Կիևի կենտրոնին հարվածելով: