ԵՐԵՎԱՆ, 7 մայիսի — Sputnik. ՀՀ Արարատի մարզի Վեդի քաղաքում անչափահասների նկատմամբ սեռական բռնության գործի շրջանակում ՆԳՆ ոստիկանությունից պաշտոնյաներ են աշխատանքից ազատվել։ Տեղեկությունը Sputnik Արմենիային հայտնեց ՆԳ նախարարի մամուլի խոսնակ Նարեկ Սարգսյանը։
«Քրեական ոստիկանության գլխավոր վարչության Արարատի մարզային վարչության պետ, ոստիկանության գնդապետ Սարիբեկ Ռուստամյանն ու համայնքային ոստիկանության Վեդիի բաժնի պետ, ոստիկանության փոխգնդապետ Արմեն Մկրտչյանն ազատվել են պաշտոններից»,- հայտնեց Սարգսյանը։
Ըստ որոշ տեղեկությունների` Վեդիում տեղի ունեցած մանկապղծության դեպքով հրաժարական է տվել նաև Արարատի մարզի դատախազ Վարդան Պողոսյանը։
Հիշեցնենք` Վեդիում մանկապղծության գործով հանրային քրեական հետապնդում է հարուցվել 2 անձի նկատմամբ, նրանք ձերբակալվել են։