ԵՐԵՎԱՆ, 5 մայիսի – Sputnik․ Բելառուսի արտաքին գործերի նախարարությունը պատասխանել է ՀՀ ԱԺ նախագահ Ալեն Սիմոնյանին, որը հայտարարել էր, թե «Հայաստանը չպետք է դառնա գուբերնիա և կառավարվի այնպես, ինչպես Բելառուսը»։
Սիմոնյանի հայտարարությունը հնչել է ընտրական գործընթացներին Ռուսաստանի ենթադրյալ միջամտության համատեքստում։ Նա նշել էր, թե ՀՀ–ի նկատմամբ փորձ է կատարվում «իրականացնել քաղաքական օպերացիա` այստեղ իշխանություն փոխելու, զավթելու համար, և Հայաստանը չպետք է դառնա գուբերնիա և կառավարվի այնպես, ինչպես Բելառուսը»։
Մինսկը ՀՀ խորհրդարանի խոսնակի հայտարարությունները որակել է «նախընտրական պոպուլիզմ և սեփական ընտրողներին ներքին լուրջ խնդիրներից շեղելու փորձ»։
«Բելառուսը ինքնիշխան պետություն է, որն ինքնուրույն է որոշում Ռուսաստանի հետ իր դաշնակցային հարաբերությունների ձևաչափը։ Մենք հպարտ ենք այս համագործակցությամբ և թույլ չենք տա, որ որևէ մեկը մեզ դասեր տա։ Միսկին ներքին քաղաքական վեճերի մեջ ներքաշելու փորձերը՝ առասպելական միջամտության քողի տակ, դիվանագիտական տարրական էթիկայի կոպիտ խախտում են», - հայտարարել է նախարարությունը։
Նշենք, որ Երևանի և Մինսկի հարաբերությունները զգալիորեն սառել են 2024 թվականին։
Բելառուսի նախագահ Ալեքսանդր Լուկաշենկոն 2024–ի մայիսի 15-17-ը Ադրբեջանում էր և այդ ընթացքում այցելել էր նաև Լեռնային Ղարաբաղ։ Նա հայտարարել էր, որ 2020 թվականի պատերազմից առաջ (դիմելով Իլհամ Ալիևին՝ նա ասել էր` «ձեր ազատագրական պատերազմից» առաջ) ինքն ու Ալիևը զրուցել են և եկել այն եզրակացության, որ պատերազմում հաղթել հնարավոր է։ Նա հավելել էր` հիմա եկել է այն ծանր ժամանակը, երբ պետք է վերակենդանացնել այդ տարածքները։
Հունիսի 13–ին խորհրդարանում ելույթ ունենալիս Փաշինյանը հայտարարեց, որ ո՛չ ինքը, ո՛չ էլ երկրի որևէ պաշտոնյա չի այցելի Բելառուս, քանի դեռ այդ երկրի նախագահը Ալեքսանդր Լուկաշենկոն է, և դա պայմանավորված է Բելառուսի նախագահի արած հայտարարություններով։