Մակրոնը երգել է, Փաշինյանը՝ նվագել. պաշտոնական ընթրիքը նախագահական նստավայրում

ԵՐԵՎԱՆ, 5 մայիսի – Sputnik․ ՀՀ նախագահի և վարչապետի անունից ի պատիվ Ֆրանսիայի նախագահ Էմանուել Մակրոնի տրվել է պետական ընթրիք։ Այս մասին տեղեկանում ենք ՀՀ կառավարության լրատվական ծառայությունից։

Պետական ընթրիքից առաջ երկու երկրների առաջնորդները միմյանց են հանձնել իրենց պետությունների բարձրագույն պատվո նշանները։

Հայաստանի Հանրապետության նախագահի հրամանագրով Ֆրանսիայի նախագահ Էմանուել Մակրոնը պարգևատրվել է Փառքի շքանշանով։ Պարգևը շնորհվել է հայ-ֆրանսիական ավանդական բարեկամական հարաբերությունների ամրապնդման, ինչպես նաև երկու երկրների միջև համագործակցության ընդլայնման գործում ներդրած նշանակալի անձնական ավանդի համար։

Ի պատասխան՝ Ֆրանսիայի նախագահի որոշմամբ` ՀՀ նախագահ Վահագն Խաչատուրյանը և վարչապետ Նիկոլ Փաշինյանը պարգևատրվել են Ֆրանսիայի բարձրագույն պարգևով՝ Պատվո լեգեոնի Մեծ Խաչ շքանշանով։

Պաշտոնական ընթրիքից հետո Մակրոնը վերցրել է խոսափողը և կատարել ֆրանսահայ շանսոնյե Շառլ Ազնավուրի ամենահայտնի երգերից մեկը՝ «Բոհեմը»։ Կադրերում երևում է, թե ինչպես է Հայաստանի վարչապետ Նիկոլ Փաշինյանը նվագակցում նրան հարվածային գործիքների վրա։

Հիշեցնենք, որ Էմանուել Մակրոնը Երևանում է Եվրոպական քաղաքական համայնքի 8–րդ գագաթնաժողովին մասնակցելու համար։ Դրան կհաջորդի Հայաստան–Եվրոպական միություն առաջին գագաթնաժողովը, որը տեղի կունենա մայիսի 5–ին։ Եվրոպական քաղաքական համայնքի 8–րդ գագաթնաժողովին մասնակցելու համար Հայաստան է ժամանել մոտ 50 բարձրաստիճան պատվիրակություն, այդ թվում` Եվրոպական խորհրդի նախագահ Անտոնիու Կոշտան և Եվրահանձնաժողովի նախագահ Ուրսուլա ֆոն դեր Լյայենը: Առաջին անգամ Հայաստան է այցելել նաև Ուկրաինայի նախագահ Վլադիմիր Զելենսկին։

Նշենք, որ Sputnik Արմենիան ԵՔՀ գագաթնաժողովի հավատարմագրում այդպես էլ չստացավ, թեև պաշտոնական մերժում նույնպես չի եղել և թույլտվություն չտալու պատճառ չի նշվել։ ՀՀ ԱԳՆ-ից մեզ պատասխանեցին, որ մենք «համակարգում չկանք»:

Հավելենք, որ Հայաստանում այսօր մեկնարկում է Հայաստան-ԵՄ առաջին գագաթնաժողովը: