ԵՐԵՎԱՆ, 4 մայիսի - Sputnik. Միգրացիայի խնդիրը լուծելու անկարողությունը նվազեցնում է եվրոպացիների վստահությունը Եվրոպական միության ինստիտուտների նկատմամբ: Այս մասին հայտարարել է Իտալիայի վարչապետ Ջորջա Մելոնին Երևանում ընթացող Եվրոպական քաղաքական համայնքի գագաթնաժողովի շրջանակներում անցկացվող պանելային քննարկման ժամանակ:
Նրա խոսքով՝ անվերահսկելի միգրացիոն հոսքերը խնդիրներ են ստեղծում քաղաքացիների անվտանգության համար։ Դրանից տուժում է նաև տնտեսությունը, աճում է սոցիալական լարվածությունը։
Մելոնին նշել է, որ հանգամանքները ստիպում են ավելի մեծ ուշադրություն դարձնել Հարավային Միջերկրածովյան երկրների հետ համագործակցությանը (որոնք Եվրոպայի հարավ անօրինական միգրացիայի հիմնական աղբյուրներից և ուղիներից են– խմբ.)՝ շեշտը դնելով տնտեսական փոխգործակցության վրա։
Նա ընդգծել է, որ անօրինական միգրացիայի ուղիները գործում են հենց այն երկրներում, որոնց հետ ԵՄ-ն ցանկանում է ընդլայնել էներգետիկ համագործակցությունը (նկատի ունի Ալժիրը և Լիբիան– խմբ.): Այսպիսով, Մելոնիի խոսքով, ԵՄ երկրների համար միանգամից մի քանի խնդիր է փոխկապակցված՝ միգրացիան, էներգետիկան, ինչպես նաև արհեստական բանականությունը:
«Երբ քաղաքացիները տեսնում են, որ կարևորագույն խնդիրները չեն լուծվում, վստահությունը (ԵՄ-ի– խմբ.) ինստիտուտների նկատմամբ կորչում է, մարդիկ դառնում են ավելի խոցելի մանիպուլյացիաների հանդեպ, այդ թվում՝ արհեստական բանականության օգնությամբ ստեղծված մանիպուլյացիաների»,-հայտարարել է Իտալիայի վարչապետը՝ հավելելով, որ ԵՄ երկրները պետք է այս խնդիրների լուծումները մշակեն միասին:
Հիշեցնենք` մայիսի 4-ին Երևանում անցկացվում է Եվրոպական քաղաքական համայնքի գագաթնաժողովը:
Sputnik Արմենիան այդպես էլ գագաթնաժողովի հավատարմագրում չստացավ, թեև պաշտոնական մերժում նույնպես չի ստացել, իսկ թույլտվություն չտալու պատճառը չի նշվել։ ԱԳՆ-ից մեզ պատասխանեցին, որ մենք «համակարգում չկանք»: