ԵՐԵՎԱՆ, 3 մայիսի – Sputnik․ Հայաստանն ու Բուլղարիան այսօր ստորագրել են ռազմավարական գործընկերության մասին համատեղ հռչակագիր։ Տեղեկությունը հայտնում է ՀՀ վարչապետի մամուլի ծառայությունը։ Փաստաթուղթը ստորագրվել է Բուլղարիայի նախագահ Իլիանա Յոտովայի և ՀՀ վարչապետ Նիկոլ Փաշինյանի հանդիպման արդյունքներով։
Հանդիպման ընթացքում ՀՀ կառավարության ղեկավարն ընդգծել է, որ երկու երկրների միջև հարաբերությունները բարձր քաղաքական երկխոսության մակարդակի վրա են, և ստորագրված փաստաթուղթն արձանագրում է դրանց ռազմավարական բնույթը։ Փաշինյանը շեշտել է, որ Հայաստանի և Բուլղարիայի միջև երկկողմ հարաբերությունները մեծ ներուժ ունեն։
Զրուցակիցները քննարկել են Հայաստան–Բուլղարիա հարաբերությունների հետագա զարգացմանը վերաբերող օրակարգային հարցեր, անդրադարձել տարածաշրջանային նշանակության տարբեր թեմաների։
Հիշեցնենք, որ Բուլղարիայի Հանրապետության նախագահ Իլիանա Յոտովան Հայաստան է ժամանել Եվրոպական քաղաքական համայնքի 8–րդ գագաթնաժողովին մասնակցելու համար, որը կայանալու է մայիսի 4-ին Երևանում։ Դրան կհաջորդի Հայաստան–Եվրոպական միություն առաջին գագաթնաժողովը, որը տեղի կունենա մայիսի 5–ին։ Հավելենք, որ Եվրոպական քաղաքական համայնքի 8–րդ գագաթնաժողովին մասնակցելու համար Հայաստան է ժամանելու մոտ 50 բարձրաստիճան պատվիրակություն, այդ թվում` Եվրոպական խորհրդի նախագահ Անտոնիու Կոշտան և Եվրահանձնաժողովի նախագահ Ուրսուլա ֆոն դեր Լյայենը: