Երևանը՝ արվեստի կենտրոն․ ի՞նչ է սպասվում Ստաս Նամինի ստեղծագործական օրերին

ԵՐԵՎԱՆ, 1 մայիսի — Sputnik. Երևանում անցկացվելու է «Ստաս Նամինի ստեղծագործական օրերը» միջոցառումը, որի ժամանակ քաղաքը վերածվելու է արվեստի կենտրոնի։

Sputnik Արմենիայի մամուլի սրահում ասուլիսի ժամանակ ռուսաստանցի երաժիշտ, կոմպոզիտոր, պրոդյուսեր, նկարիչ, թատրոնի և կինոյի ռեժիսոր Ստաս Նամինը (Անաստաս Միկոյանի թոռը) ներկայացրեց մայիսի 3-11-ը սպասվող միջոցառումները։

Նաա նշեց, որ Երևանում ներկայացվելու են «Բիթլոմանիա» և «Մազեր» մյուզիքլները, ինչպես նաև Վիլյամ Սարոյանի պատմվածքի հիման վրա բեմադրված «Իմ սիրտը լեռներում է» ներկայացումը։

Նամինն անդրադարձավ «Իմ սիրտը լեռներում է» ներկայացմանը, որի ցուցադրությունը կայանալու է մայիսի 3-ին։ Նա նշեց, որ ներկայացման մեջ բոլոր դերասանները ռուսներ են, բայց բոլորը խոսում ու երգում են հայերեն։ Ռեժիսորը շեշտեց՝ Մոսկվայում իրենք միակն են, որ հայերենով բեմադրություններ են անում, ու իր համար կարևոր է դրանցով հանդես գալ նաև Երևանում։

Ինչ վերաբերում է ամերիկյան «Մազեր» մյուզիքլին (Hair), որը խաղալու են մայիսի 5-ին, ապա Նամինը վստահեցրեց՝ իրենց բեմադրությունը տվյալ մյուզիքլի պատմության մեջ լավագույն 5-յակում է, կատարվում է և՛ ռուսերեն, և՛ անգլերեն։ «Բիթլոմանիա» մյուզիքլի ընթացքում էլ անգլիական «Բիթլզ» խմբի 25 երգ է հնչելու։ Այն ցուցադրվելու է մայիսի 6-ին։

Նշենք, որ «Ստաս Նամինի ստեղծագործական օրերը Երևանում» միջոցառումների շրջանակում մայիսի 7–ին Հակոբ Պարոնյանի անվան երաժշտական կոմեդիայի պետական թատրոնում հոբելյանական մեծ համերգով ելույթ է ունենալու «Ցվետի» խումբը։

Արտիստը շեշտեց, որ «Ցվետի» խումբը վերջին անգամ Հայաստանում եղել է 1970-ականներին։ Նրա կարծիքով` աշխարհում մարդկանց ճաշակը բավականին ընկել է։ Այնուամենայնիվ վստահ է՝ «Բիթլզ» լսող երաժշտասերները կգնահատեն «Ցվետի» խմբի կատարումները։

Հայաստանի նկարիչների միությունում մայիսի 4-ին տեղի կունենա Նամինի գեղանկարչական և գրաֆիկական աշխատանքների ցուցահանդեսը: