ԵՐԵՎԱՆ, 1 մայիսի — Sputnik. Գործարար, «Ուժեղ Հայաստան» կուսակցության առաջնորդ Սամվել Կարապետյանը պատմել է իր առաջին աշխատանքի մասին` նշելով, թե որն է աշխատող մարդու հաջողության գրավականը։
«Աշխատանքի հետ կապված շատ հիշողություններ կան, ու լավ հիշողություններ են։ Երբ ես ուսանող էի, իմ հորեղբայրները «խոպանչիներ» էին, նրանք ասֆալտի բրիգադներ էին Տաշիրից տանում հիմնականում Օդեսա և Կիրովոգրադ։ Շատ մեծ աշխատանք էին անում, ես ու եղբայրս էլ ծնողներին օգնելու համար ամռան 3 ամիսը գնում էին մեր հորեղբայրների մոտ։ Շատ ծանր աշխատանք էր, ասֆալտ էինք փռում՝ ձեռքով։ Այն, ինչ հիմա տեխնիկան է անում, մենք այն ժամանակ դա ձեռքով ենք արել»,- ասաց Կարապետյանը։
Նա ընդգծեց՝ իր վաստակած գումարի կեսը ծնողներին է տվել, մյուս կեսն էլ հետը Երևան է բերել։ Այդ ժամանակ Զեյթունի հանրակացարանում էր ապրում, ու աշխատած գումարն ու ստացած կրթաթոշակը միասին ամբողջ տարի իրեն բավականացնում էր։
Կարապետյանը վստահ է՝ հաջողությունների գրավականը ծանր աշխատանքն է։ Նա նշում է, որ համառությունն էլ է հաջողության գրավական, ինչպես նաև շատ կարևոր է կատարած գործից հասկանալը։
Արդեն ավելի հասուն տարիքում՝ 1990-ականներին, Կարապետյանը տեղափոխվել է Ռուսաստան և ապրել է, ինչպես ինքն է ասում, «Փաշինյանի շատ սիրելի Կալուգայում», որտեղ բավականին ծանր ժամանակներ է ունեցել։ Ասում է՝ ողջ մնալ-չմնալու տարիներ են եղել, բայց իրենք դրանք պատվով անցել են։
Հիշեցնենք, որ աշխարհի ավելի քան հարյուր պետություններում մայիսի 1–ը նշվում է որպես Աշխատավորների համերաշխության միջազգային օր: Պատմության մեջ մայիսի 1–ը մտել է 1884 թ., երբ ԱՄՆ-ում և Կանադայում կազմակերպվեցին ցույցեր` ի պաշտպանություն ութժամյա աշխատանքային օրվա: Խորհրդային Միությունում մայիսի 1–ը նշվում էր որպես մեծ տոն` ուղեկցվելով մեծ շքերթով, որին մասնակցում էին գրեթե բոլորը: Սովետական Հայաստանում այս տոնը սկսվեց նշվել 1919 թ.: «Տոների և հիշատակի օրերի մասին» ՀՀ օրենքում այս օրը ամրագրված է որպես Աշխատանքի օր, և այն ոչ աշխատանքային է: