ԵՐԵՎԱՆ, 30 ապրիլի — Sputnik. 2029 թվականին, երբ Հայաստանը հյուրընկալի ՖԻՖԱ–ի երիտասարդական աշխարհի առաջնությանը, ակնկալվում է, որ այդ օրերին մեր երկիր կայցելի ավելի քան 100 հազար երկրպագու։ Այս մասին ՀՀ կառավարության այսօրվա նիստի ժամանակ հայտարարեց ՀՀ ԿԳՄՍ նախարար Ժաննա Անդրեասյանը։
Ավելի վաղ հայտնել էինք, որ Կանադայի Վանկուվեր քաղաքում կայացած ՖԻՖԱ-ի գործկոմի նիստի ընթացքում հաղթող է ճանաչվել Հայաստանի ու Վրաստանի՝ մրցաշարը հյուրընկալելու համատեղ հայտը։
Անդրեասյանը տեղեկացրեց, որ մրցաշարի անցկացման ծրագիրը դեռ նախնական է ու հնարավոր է այն փոփոխությունների ենթարկվի, սակայն պլանավորվում է, որ Երևանում տեղի կունենա մինչև 20 խաղ, Վանաձորում և Իջևանում միասին` մինչև 10 խաղ։
Մրցաշարը կանցկացվի 2029 թ. սեպտեմբեր–հոկտեմբեր ամիսներին։
ՀՀ վարչապետ Նիկոլ Փաշինյանն իր հերթին ասաց, որ մրցաշարի հետ կապված մեծ խնդիր չունեն` փոքր հարցեր են, որոնք կստանան լուծումներ։
«Երևանի ու Վանաձորի ստադիոների մասով հանգիստ եմ, սակայն Իջևանի մասով անհանգիստ եմ, քանի որ այնտեղ զրոյից պետք է այն կառուցվի, թեև արդեն կան ընկերություններ, որոնք պարտավորվում են ավելի կարճ ժամանակում կառուցել»,– հայտարարեց վարչապետը։
Նա նշեց, որ զբոսաշրջիկների մեծ հոսքին պատրաստ լինելու համար հյուրանոցային ոլորտը պետք է քաջալերվի, իսկ սննդի ոլորտը` խթանվի, հատկապես Վանաձորում։
Հիշեցնենք, որ 2024թ–ի հունիսին հայտնի դարձավ, որ Հայաստանն ու Վրաստանը միասնական հայտ են ներկայացրել ֆուտբոլի աշխարհի` 2029 թվականի երիտասարդական առաջնությունն անցկացման համար։