ԵՐԵՎԱՆ, 26 ապրիլի – Sputnik. ՀՀ վարչապետ Նիկոլ Փաշինյանը մեկնաբանել է Վաշինգտոնում Սպիտակ տան թղթակիցների ասոցիացիայի և ԱՄՆ նախագահ Դոնալդ Թրամփի հրավիրված ընթրիքի ժամանակ տեղի ունեցած կրակոցները։
Հայտնել էինք, որ Սպիտակ տան թղթակիցների ասոցիացիայի ընթրիքին, որի մասնակցում էր նաև ԱՄՆ նախագահ Դոնալդ Թրամփը, կրակոցներ են հնչել։ Թրամփին շտապ դուրս են բերել ընթրիքից։ Կրակահերթ արձակելու կասկածանքով ձերբակալվածը Կալիֆոռնիայի 31-ամյա բնակիչ Քոուլ Թոմաս Ալենն է։ Նա վիրավոր է, տեղափոխվել է հիվանդանոց։
«Ուրախ եմ լսել, որ նախագահ Դոնալդ Թրամփը, առաջին տիկինը, փոխնախագահը և ներկա գտնվող մյուսներն իրենց անվտանգ են զգում թղթակիցների մասնակցությամբ ընթրիքի ժամանակ տեղի ունեցած տագնապալի կրակոցներից հետո։ Բռնությունը տեղ չունի մեր ժողովրդավարական հասարակություններում», - գրել է ՀՀ վարչապետը X սոցիալական ցանցի իր էջում։
Հիշեցնենք` ԶԼՄ-ների տվյալներով, միջոցառման մասնակիցները լսել են հինգից ութ կրակոց։
Ինչպես հայտնում է CNN-ը, ԱՄՆ նախագահը և նրա վարչակազմի մյուս անդամներն անվտանգ են, միջադեպի հետևանքով ոչ ոք չի տուժել։
ԱՄՆ գլխավոր դատախազի պաշտոնակատար Թոդ Բլանշը հայտարարել է, որ կրակելու կասկածանքով ձերբակալված անձին առաջադրվելու են բազմաթիվ մեղադրանքներ։ Կատարվում է քննություն։