ԵՐԵՎԱՆ, 23 ապրիլի – Sputnik. Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Քևին Համիլթոնի՝ Հայաստան կատարած այցում որևէ առանձնահատկություն չկա։ Այսօր կառավարության նիստից հետո լրագրողների հետ ճեպազրույցում հայտարարեց ՀՀ վարչապետ Նիկոլ Փաշինյանը։ Նրա խոսքով՝ ՀՀ անվտանգային համակարգում որևէ բան չի փոխվելու։
«ՆԱՏՕ-ի հատուկ ներկայացուցիչը 20 տարվա ընթացքում տասնյակ անգամ այցելել է Հայաստան, և այլ հավելյալ մեկնաբանության նյութ չկա։ Մեր անվտանգային համակարգը լինելու է այնպես, ինչպես նախկինում պատկերացնում էինք»,– ասաց նա։
Հիշեցնենք, որ Հայաստանի բարձրաստիճան պաշտոնյաների հանդիպումները ՆԱՏՕ-ի ներկայացուցիչների հետ վերջին շրջանում ակտիվացել են։ Օրերս ՀՀ վարչապետ Նիկոլ Փաշինյանը, Անվտանգության խորհրդի քարտուղար Արմեն Գրիգորյանը և ՊՆ ղեկավար Սուրեն Պապիկյանն ընդունել են Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Քևին Համիլթոնին։