Որքանո՞վ է կարևոր լուսանկարը ասելիքը ներկայացնելու համար. SputnikPro-ի վարպետության դասը

ԵՐԵՎԱՆ,21 ապրիլի – Sputnik. Նյութերը ներկայացնելու համար որքանո՞վ է կարևոր լուսանկարը, և կարո՞ղ է արհեստական բանականությունը (ԱԲ) փոխարինել մարդուն: SputnikPro հերթական կրթական ծրագրի ժամանակ Հայ-ռուսական համալսարանի մագիստրանտների համար վարպետության դասին այս թեմաներին անդրադարձավ ՌԻԱ Նովոստիի տեսողական նախագծերի ծառայության ավագ խմբագիր և Մոսկվայի պետական համալսարանի ժուռնալիստիկայի ֆակուլտետի դասախոս Եկատերինա Վոլկովան:

Եկատերինա Վոլկովա

Վոլկովան ամերիկա-իրանական հակամարտության մասին Sputnik Արմենիայի նյութերի օրինակով բուհի ուսանողներին պատմեց լրատվամիջոցներում լուսանկարչության հիմնական գործառույթների և տեղեկատվական լուսանկարների ընտրության չափանիշների մասին։

«Իմ կարծիքով` տվյալ պարագայում լուսանկարներն օժանդակում են նյութի վերնագրին՝ արտացոլելով բովանդակությունը։ Բիլդ–խմբագրի (ֆոտոխմբագրի - խմբ.) խնդիրն այս դեպքում նկար ընտրելն է, հասկանալը, թե ինչ պատկեր է պետք, ինչպես կարելի է նկարազարդել նյութը, ինչպես ճիշտ նկարագրություն գրել դրա համար», – ասաց Եկատերինա Վոլկովան։

SputnikPro-ի «Լուսանկարչությունը` որպես ժամանակակից մուլտիմեդիա տեղեկատվական ռեսուրսի հիմնական բաղադրիչ. բիլդ-խմբագրի աշխատանքը» թեմայով դասընթացը

Որպես երիտասարդ լուսանկարիչների համար հաջողված օրինակ, թե ինչպես է զգացմունքային արձագանքն ամրապնդում նյութի հիշելիությունը, նա ցույց տվեց Մխիթար Խաչատրյանի «Քսաներորդ դարի Մադոննան» (հայտնի է նաև որպես «հայկական Մադոննա») լուսանկարը:

SputnikPro-ի «Լուսանկարչությունը` որպես ժամանակակից մուլտիմեդիա տեղեկատվական ռեսուրսի հիմնական բաղադրիչ. բիլդ-խմբագրի աշխատանքը» թեմայով դասընթացը

Ըստ Վոլկովայի` գրաֆիկայի և տեխնիկայի տեսակետից գեղեցիկ, գրավիչ լուսանկար ստեղծելու փոխարեն հեղինակը շեշտը դրել է մեր գիտակցության մեջ գոյություն ունեցող կերպարների և նախակերպարների վրա: Ի վերջո, Մադոննան և՛ Աստվածածինն է, և՛ մայրը, ինչի շնորհիվ այս լուսանկարն ինչ–որ առումով ձեռք է բերել լայն ճանաչում։

«Քսաներորդ դարի Մադոննան» լուսանկարը

«Բավական է կնոջ և նրա երեք երեխաների վրա մեկ հայացք, և ամեն ինչ պարզ է դառնում առանց բառերի։ Լուսանկարիչը կարող է մի լուսանկարով տեքստային նյութից ավելին ասել։ Եվ կան այնպիսի նկարներ, որոնք ոչ թե ուղղակի մտնում են ֆոտոլրագրության պատմություն, այլև մնում են հանդիսատեսի սրտերում. Խաչատրյանի այս լուսանկարը հենց այդպիսին է», — նշեց փորձագետը:

Եկատերինա Վոլկովա

Նա նաև անդրադարձավ մեր օրերի շատ լուսանկարիչների հետաքրքրող թեմային՝ արհեստական բանականությունը ամբողջությամբ երբևէ կփոխարինի՞ նրանց: Վոլկովայի կարծիքով՝ ԱԲ-ի շուրջ տեղի ունեցող գործընթացներն այսօր հիշեցնում են 20-ամյա վաղեմության վեճերն այն մասին, թե արդյոք պլանշետները դուրս կմղեն սովորական գրքերը:

Պրակտիկան ցույց է տվել, որ պլանշետների հանդեպ հետաքրքրքրությունն աստիճանաբար մարում է, իսկ գրքերը շարունակում են տպագրվել։ Նման մի բան էլ կատարվում է նեյրոցանցի հետ՝ տեղի է ունենում հեղինակային բովանդակության արժեքի որոշակի վերագնահատում, բարձրանում է հեղինակի դերը, առաջանում է ըմբռնում, որ կենդանի մարդուն, լրագրողին և լուսանկարչին անհնար է լիարժեք փոխարինել «հուշումներով» ստեղծված բովանդակությամբ։