ԵՐԵՎԱՆ, 20 ապրիլի – Sputnik. ՀՀ–ում ոչ պիտանի ճանաչված անձը հետազոտվել է զինվորական ծառայությունից ազատվելու նպատակ հետապնդող անձի փոխարեն։ Տեղեկությունը հայտնում է ՀՀ քննչական կոմիտեն։
Նախաքննական մարմինը պարզել է, որ Ժ.Ս.–ն, տեղյակ լինելով, որ Գ.Դ.–ն 2022 թ. ձմեռային զորակոչին առողջական վիճակով պայմանավորված ոչ պիտանի է ճանաչվել պարտադիր ժամկետային զինվորական ծառայության համար, իսկ Ն.Հ.–ն որդուն՝ Ռ.Խ.–ին, զինվորական ծառայությունից վերջնականապես ազատելու նպատակ է հետապնդում, նրա հետ նախնական համաձայնության է եկել, որպեսզի Ռ.Խ.–ի փոխարեն Գ.Դ.–ն անցնի համապատասխան հետազոտություն:
2024 թ. մայիսի 30–ին Ն.Հ.–ն Ժ.Ս.–ի ցուցումով իր որդու փոխարեն Գ.Դ.–ին է ուղեկցել բժշկական կենտրոն, որտեղ ներկայացրել է Ռ.Խ.–ի ծննդյան վկայականը, և Գ.Դ.–ն նրա փոխարեն անցել է ՄՌՏ հետազոտություն:
«Բժիշկը կազմել է կեղծ փաստաթուղթ՝ չգիտակցելով, որ Ռ.Խ.–ի փոխարեն հետազոտության է ենթարկվել Գ.Դ.–ն: Ռ.Խ.–ն, տեղյակ լինելով, որ իր վերաբերյալ կազմված փաստաթուղթը կեղծ է, այնուամենայնիվ, այն ներկայացրել է ՀՀ ՊՆ զինկոմիսարիատ, որի հիման վրա ճանաչվել է սահմանափակումով պիտանի զինվորական ծառայության համար»,– ասված է հաղորդագրության մեջ:
ՔԿ–ից նշում են, որ Ռ.Խ.–ի նկատմամբ հանրային քրեական հետապնդում է հարուցվել ՀՀ քրեական օրենսգրքի 457-րդ հոդվածի 1-ին մասով (փաստաթղթեր, դրոշմներ, կնիքներ, ձևաթղթեր կեղծելը կամ կեղծ փաստաթղթեր, դրոշմներ, կնիքներ, ձևաթղթեր իրացնելը, պատրաստելը կամ օգտագործելը), Ն.Հ.-ի, Գ.Դ.-ի նկատմամբ՝ 457-րդ հոդվածի 2-րդ մասով (մի խումբ անձանց կողմից նախնական համաձայնությամբ փաստաթղթեր, դրոշմներ, կնիքներ, ձևաթղթեր կեղծելը կամ կեղծ փաստաթղթեր, դրոշմներ, կնիքներ, ձևաթղթեր իրացնելը, պատրաստելը կամ օգտագործելը), Ժ.Ս.-ի նկատմամբ՝ 46-457-րդ հոդվածի 2-րդ մասով (մի խումբ անձանց կողմից նախնական համաձայնությամբ փաստաթղթեր, դրոշմներ, կնիքներ, ձևաթղթեր կեղծելը կամ կեղծ փաստաթղթեր, դրոշմներ, կնիքներ, ձևաթղթեր իրացնելը, պատրաստելը կամ օգտագործելը կազմակերպելը):
Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և քննության առնելու համար դատարան ուղարկելու միջնորդությամբ: