Ադրբեջանը խոչընդոտում է Թուրքիա–Հայաստան հարաբերությունների կարգավորմանը. Ալեն Սիմոնյան

ԵՐԵՎԱՆ, 20 ապրիլի - Sputnik. Ադրբեջանը, օգտագործելով իր լոբբիստական ազդեցությունը, խոչընդոտում է Թուրքիա–Հայաստան հարաբերությունների կարգավորման գործընթացը։ «Ակոս» օրաթերթի փոխանցմամբ` ՀՀ ԱԺ նախագահ Ալեն Սիմոնյանն այս մասին ասել է Թուրքիայում` հայկական մամուլի ներկայացուցիչների հետ հանդիման ժամանակ։ Սիմոնյանն անդրադարձել է նաև հայ–թուրքական սահմանի բացման հնարավորությանը` հույս հայտնելով, որ շուտով այն իրականություն կդառնա։

Հիշեցնենք` Ալեն Սիմոնյանը Թուրքիա է մեկնել` մասնակցելու Միջխորհրդարանական միության 152-րդ վեհաժողովին։

Ավելի վաղ ՀՀ ԱԺ նախագահը Ստամբուլում հանդիպել էր Ադրբեջանի Միլի Մեջլիսի ղեկավար Սահիբա Գաֆարովայի, ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի, Թուրքիայի խորհրդարանի նախագահ Նուման Քուրթուլմուշի հետ։ ՀՀ ԱԺ խոսնակը Ստամբուլում հանդիպել է նաև Պոլսո հայոց պատրիարք Սահակ եպիսկոպոս Մաշալյանի հետ։