ԵՐԵՎԱՆ, 18 ապրիլի – Sputnik. ՀՀ վարչապետ Նիկոլ Փաշինյանը վստահեցնում է, որ ԱԺ ամբիոնից ընդդիմադիր ուժերի ընտրողներին «շուն ու շանգյալ» անվանելով չի փորձել ազդել ընտրողների ազատ կամարտահայտման վրա։ ՀՀ կառավարությունում լրագրողների հետ ճեպազրույցում լրագրողը մեջբերեց ԱԺ ամբիոնից Փաշինյանի ելույթի հատվածը ընդդիմության ընտրողների հասցեին։
Նշենք, որ ապրիլի 17–ին Փաշինյանն ԱԺ ամբիոնից ընդդիմադիր 3 ուժերի ընտրողներին անվանեց «շուն ու շանգյալ»։ Նա պնդեց, թե գտել է նախկին–ներկա բանավեճը հաղթահարելու ձևը` 2026 թ. ԱԺ ընտրություններին «Ուժեղ Հայաստան» դաշինքն ու ԲՀԿ–ն անցողիկ շեմը չպիտի հաղթահարեն ու անցնեն խորհրդարան։
«Դուք մեջբերեցիք իմ խոսքերը, բայց դրանք ամբողջական չեն։ Ես նախ ասել եմ հետևյալը, որ քաղաքական ուժերը՝ նախկինների եռագլուխ կուսակցությունը, գալիս մարդկանց անվանում են «ժեխ», « շունշանգյալ», «բոշա», և հետո ասում է՝ մենք ընտրություններում հաղթելու ենք։ Եվ ես մտածում եմ, որ էդ ուժերը երբ ասում են, որ կարող են ընտրություններում հաջողություն ունենալ, նրանք դրանով մարտահրավեր են նետում Հայաստանի Հանրապետության քաղաքացիներին։ Հայաստանի Հանրապետության բոլոր քաղաքացիներին կոչ եմ անում իրենց քաղաքական դիրքորոշմամբ ցույց տալ, թե ո՞վ է իրականում «ժեխ», « շունշանգյալ», «բոշա», նկատի ունենալով պատերազմի եռագլուխ կուսակցության վերնախավի։ Եվ այո, շատ անհարգալից կլինի իմ կողմից, եթե ես մտածեմ, որ Հայաստանի Հանրապետությունում կան քաղաքացիներ, ովքեր պատրաստ են նախկինների եռագլուխ կուսակցությաը ձայն տան»,–ի պատասխան հարցի՝ ասաց Փաշինյանը։
Նա ընդգծեց, որ մարդիկ իհարկե կարող են ընդդիմությանը ձայն տալ, բայց բացի այդ 3 քաղաքական ուժերից, էլի կան ընդդիմադիր ուժեր, որոնք ընտրողներին «ժեխ», « շունշանգյալ», կամ «բոշա» չեն ասում։
Փաշինյանը կրկնեց, որ այնպիսի քաղաքական զգացողություն ունի, որ թվարկված 3 ուժերից ոչ մեկը չի հաղթահարելու խորհրդարան մտնելու անցողիկ շեմը։
Հիշեցնենք՝ Ազգային ժողովի հերթական ընտրությունները նախատեսված են հունիսի 7-ին։