ԵՐԵՎԱՆ, 18 ապրիլի – Sputnik. Իրանն ԱՄՆ-ից բանակցությունների նոր առաջարկներ է ստացել. դրանք փոխանցել է Պակիստանի գլխավոր շտաբի պետը Թեհրան կատարած այցի ընթացքում: Իրանական կողմն ուսումնասիրում է այդ առաջարկները՝ միևնույն ժամանակ հայտարարելով, որ չի նահանջելու իր դիրքերից և զիջումների չի գնալու, իսկ զինադադարի պայմանը բոլոր ճակատներում, այդ թվում՝ Լիբանանում, կրակի դադարեցումն է։
Իրանը նաև մտադիր է վերահսկել Հորմուզի նեղուցով երթևեկությունը մինչև պատերազմի ավարտը: Հրադադարի պահպանման դեպքում այդ երթուղին կբացվի ժամանակավորապես և միայն առևտրային նավերի համար, դրանով անցումը կլինի Իրանի զինված ուժերի վերահսկողության ներքո և թույլտվությամբ: «Թշնամի երկրների» ռազմանավերի ու նավերի վրա այս պայմանը չի տարածվում։ Նավագնացության ցանկացած խոչընդոտ Թեհրանը կհամարի հրադադարի խախտում։ Նեղուցով ԱՄՆ-ի ռազմական մատակարարումները սպառնալիք կհամարվեն։
ԱՄՆ ռազմածովային ուժերը ապրիլի 13-ին սկսել են շրջափակել Հորմուզի նեղուցի երկու կողմերում գտնվող իրանական նավահանգիստները: Վաշինգտոնը վստահեցնում է, որ Իրանի հետ կապ չունեցող նավերը կարող են ազատ անցնել Հորմուզի նեղուցով, եթե դրա համար Թեհրանին չեն վճարել: Իրանի իշխանությունները վճարի ներդրման մասին չեն հայտարարել, բայց խոսել են նման ծրագրերի մասին։
Հիշեցնենք` Իրանն ու ԱՄՆ-ն ապրիլի 11-ին բանակցություններ սկսեցին Իսլամաբադում այն բանից հետո, երբ Թրամփը ապրիլի 8-ի գիշերը հայտարարեց Թեհրանի հետ երկշաբաթյա հրադադարի շուրջ համաձայնության հասնելու մասին: Սակայն արդեն ապրիլի 12-ի առավոտյան ամերիկյան պատվիրակությունը գլխավորող փոխնախագահ Ջեյ Դի Վենսը հայտնեց, որ կողմերը չեն կարողացել համաձայնության գալ:
Ավելի ուշ Դոնալդ Թրամփը հայտարարեց, որ ԱՄՆ-ն կսկսի Հորմուզի նեղուց մուտք գործող և այնտեղից դուրս եկող բոլոր նավերի շրջափակումը: