ԵՐԵՎԱՆ, 16 ապրիլի – Sputnik. ՌԴ փոխարտգործնախարար Միխայիլ Գալուզինը Մոսկվայում Թուրքիայի դեսպան Թանժու Բիլգիչին է ներկայացրել Ուկրաինայի շուրջ իրավիճակի զարգացման և հակամարտության կարգավորման հեռանկարների վերաբերյալ ռուսական կողմի գնահատականները։ Այս մասին հայտնում է ՌԴ արտգործնախարարությունը։
«Զրուցակիցները մտքեր են փոխանակել ուկրաինական ճգնաժամի շուրջ ստեղծված իրավիճակի վերաբերյալ։ Թուրքական կողմին են ներկայացվել ՌԴ–ի սկզբունքային գնահատականները Ուկրաինայի շուրջ իրավիճակի զարգացման և հակամարտության կարգավորման հեռանկարների վերաբերյալ՝ 2025 թվականի օգոստոսին Անքորիջում կայացած ռուս-ամերիկյան գագաթնաժողովի արդյունքում ձեռք բերված փոխըմբռնումների համատեքստում»,-ասված է նախարարության կայքում հրապարակված հայտարարության մեջ։
Հիշեցնենք` Ռուսաստանի նախագահ Վլադիմիր Պուտինն ու ԱՄՆ նախագահ Դոնալդ Թրամփը հանդիպեցին Ալյասկայում 2025 թվականի օգոստոսի 15-ին։ Հանդիպումը կայացավ Անքորիջի Էլմենդորֆ-Ռիչարդսոն ռազմաբազայում։ Նախագահները քննարկեցին ուկրաինական հակամարտության կարգավորման ուղիները։
Երկու առաջնորդներն էլ հանդիպումը դրական որակեցին։ Ռուսաստանի նախագահը գագաթնաժողովից հետո հայտարարեց Ուկրաինայում հակամարտության ավարտի հնարավորության մասին և ընդգծեց` Ռուսաստանը շահագրգռված է, որ կարգավորումը երկարաժամկետ լինի։
2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Պուտինի խոսքով` նպատակը մեկն է` պաշտպանել նրանց, ովքեր 8 տարի շարունակ ծաղրի ու ցեղասպանության են ենթարկվել Կիևի ռեժիմի կողմից, և դրա համար նախատեսվում է իրականացնել Ուկրաինայի ապառազմականացում և ապազգայնականացում, դատի տալ բոլոր ռազմական հանցագործներին, որոնք պատասխանատու են Դոնբասի խաղաղ բնակիչների դեմ արյունալի հանցագործությունների համար: Արևմուտքի երկրներն ի պատասխան լայնածավալ պատժամիջոցներ են սահմանել Ռուսաստանի դեմ։
Մարտական գործողություններն ընթանում են մինչ օրս։
Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։