ԵՐԵՎԱՆ, 9 ապրիլի – Sputnik. ԱՄՆ նախագահ Դոնալդ Թրամփը նախազգուշացրել է, որ եթե Իրանի հետ հրադադարի համաձայնագիրը չկատարվի, կսկսվեն ավելի լայնածավալ ռազմական գործողություններ, քան նախկինում:
«Եթե ինչ-ինչ պատճառներով դա տեղի չունենա, ինչը խիստ քիչ հավանական է, այդ ժամանակ կսկսվի հրաձգություն՝ շատ ավելի մասշտաբային, կատարելագործված և հզոր, քան երբևէ»,-նշել է ԱՄՆ նախագահը Truth Social սոցցանցի իր էջում:
Թրամփը հայտարարել է, որ ԱՄՆ-ի բոլոր նավերը, ինքնաթիռներն ու զինծառայողները կմնան իրենց տեղերում Իրանի մոտ այնքան ժամանակ, քանի դեռ չի կատարվել ձեռք բերված համաձայնությունը:
«Բոլոր ամերիկյան նավերը, թռչող սարքերը և զինվորականները՝ լրացուցիչ զինամթերքի, սպառազինության և մնացած ամեն ինչի հետ միասին, որոնք անհրաժեշտ են արդեն զգալիորեն թուլացած հակառակորդի ոչնչացման համար,կմնան Իրանի տարածքում և նրա շուրջ այնքան ժամանակ, քանի դեռ լիովին չի կատարվել ձեռք բերված իրական համաձայնությունը», - գրել է ԱՄՆ-ի ղեկավարը։
Հիշեցնենք՝ ապրիլի 8-ի գիշերը ԱՄՆ նախագահ Դոնալդ Թրամփը համաձայնել է երկու շաբաթով դադարեցնել Իրանի ուղղությամբ հարվածները և հավաստիացրել է, որ հրադադարը կլինի երկկողմանի։ Իրանի ազգային անվտանգության գերագույն խորհուրդը հայտարարել է, որ Թեհրանը ԱՄՆ-ի հետ բանակցություններ կսկսի ապրիլի 10-ին Իսլամաբադում (Պակիստան)։
Իրանական կողմը հայտարարել է, որ ԱՄՆ–ն ստիպված է եղել ընդունել Թեհրանի` 10 կետից բաղկացած առաջարկը, որը ներառում է Հորմուզի նեղուցի նկատմամբ վերահսկողության պահպանում և պատերազմի դադարեցում բոլոր ճակատներում, այդ թվում՝ Լիբանանի իսլամական դիմադրության դեմ։
Միևնույն ժամանակ, ինչպես հայտնում է «Times of Israel»-ը, Իսրայելի վարչապետ Բենիամին Նեթանյահուի գրասենյակից հայտարարել են, որ Իրանի, ԱՄՆ-ի և Իսրայելի միջև երկշաբաթյա հրադադարի մասին համաձայնագիրը չի տարածվում Լիբանանի վրա։