ԵՐԵՎԱՆ, 7 ապրիլի – Sputnik. Իրանական անօդաչուն հարվածել է Քուվեյթի Ալի Ալ-Սալեմ ավիաբազային, 15 ամերիկացի զինվորական է տուժել։ Այս մասին հայտնում է CBS-ը։
Tasnim գործակալության փոխանցմամբ՝ Իրանը հարձակվել է Սաուդյան Արաբիայի Էլ Ջուբայլ քաղաքում գտնվող նավթաքիմիական համալիրի վրա, ինչի հետևանքով խոշոր հրդեհ է բռնկվել էներգետիկ օբյեկտներում։ Տուժածների և ավերումների մասին դեռ տեղեկություններ չկան։
Իսկ Իսրայելը հարձակվել է Թեհրանի Մեհրաբադ միջազգային օդանավակայանի վրա, հաղորդում են տեղական լրատվամիջոցները։ Ավելի վաղ իսրայելական բանակը հայտարարել էր Իրանում «ենթակառուցվածքները վնասելուն ուղղված» ավիահարվածների շարքի ավարտի մասին։
Իսրայելը նաև շարունակում է հարվածել Լիբանանին։ Գիշերը հարձակման է ենթարկվել Մաարեկ շրջանը։ Լիբանանյան լրատվամիջոցների փոխանցմամբ՝ մեկ մարդ զոհվել է, երկուսը՝ վիրավորվել։ Fars գործակալությունը հայտնում է, որ հակամարտության սկսվելուց ի վեր Իրանում զոհվել է 250 աշակերտ և 60 ուսուցիչ։ 750 ուսումնական հաստատություն է վնասվել։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Իրավիճակի սրացման ֆոնին մի շարք երկրներում վառելիքի գների աճ է նկատվում, ինչը կապված է Հորմուզի նեղուցով նավարկությունը փաստացի սահմանափակելու հետ (Հորմուզի նեղուցը Պարսից ծոցի երկրներից նավթի և հեղուկացված բնական գազի մատակարարման հիմնական երթուղին է)։ Ռուսաստանի փոխարտգործնախարար Անդրեյ Ռուդենկոն հայտնել է, որ Հորմուզի նեղուցի շուրջ ստեղծված իրավիճակի հարցը քննարկվում է ՄԱԿ-ի անվտանգության խորհրդի մակարդակով, որտեղ արդեն ներկայացվել են տարբեր պետությունների համապատասխան բանաձևերի նախագծերը: