ԵՐԵՎԱՆ, 7 ապրիլի – Sputnik. Արհեստական բանականությամբ գեներացված հեռուստաբովանդակությունը Հայաստանում հեռարձակելիս այսուհետ պետք է պարտադիր մակնշվի։ ԱԺ–ն արտահերթ նիստում ընդունեց «Տեսալսողական մեդիայի մասին» օրենքում լրացումներ նախատեսող նախագիծը։
Ինչպես օրինագիծը ներկայացնելիս հայտարարեց ՀՀ բարձր տեխնոլոգիական արդյունաբերության նախարար Մխիթար Հայրապետյանը, ընդունումից հետո, ակնկալելու ենք, որ տեսալսողական մեդիա ծառայություն մատուցող հեռարձակողները արհեստական բանականությամբ գեներացված կամ այլ թվային տեխնոլոգիական լուծումներով գեներացված հեռուստաբովանդակությունը կամ սինթետիկ բովանդակությունը հեռարձակելիս պարտադիր կերպով օրենքի իմպերատիվ պարտադրանքով մակնշեն։
Նախարարն ընդգծեց` խոսքը համապատասխան լեյբլինգի մասին է, որի միջոցով բովանդակության վրա հստակ տեսանելի կլինի, որ այն ստեղծվել է արհեստական բանականության գործիքակազմով։
Տեսանյութերի դեպքում նյութերի սկզբում և վերջում պետք է գրվի, որ տեսանյութը գեներացվել է արհեստական բանականության միջոցով: Աուդիոնյութերի (ռադիո) դեպքում դա պետք է հայտարարվի որոշակի ծրագրի կամ բովանդակության սկզբում և վերջում։
Պահանջների պահպանման վերահսկողությունն իրականացնելու է Հեռուստատեսության և ռադիոյի հանձնաժողովը: Մակնշման բացակայության համար նախատեսված է 300 հազար դրամի չափով (մոտ 790 դոլար) տուգանք։
Ստուգումները կարող են իրականացվել ինչպես մոնիտորինգի շրջանակներում, այնպես էլ լսարանի և կազմակերպությունների դիմումների հիման վրա:
Նախարարի խոսքով՝ արդյունավետ վերահսկողության համար անհրաժեշտ կլինեն թվային գործիքներ, որոնք թույլ կտան տարբերակել օրիգինալ բովանդակությունը գեներացվածից։ Գերատեսչությունը պատրաստ է հանձնաժողովին ապահովել համապատասխան ծրագրային ապահովմամբ։ Անհրաժեշտության դեպքում նյութերը փորձաքննության կուղարկվեն արտասահմանյան կենտրոններ:
Առաջիկա ամիսներին նախարարությունը մտադիր է նմանատիպ կարգավորումներ ներկայացնել նաև համացանցային տիրույթի համար: