ԵՐԵՎԱՆ, 6 ապրիլի - Sputnik. Երևանի մի շարք փողոցներում հիմնանորոգման ու միջին նորոգման աշխատանքներ են իրականացվում, բայց քաղաքապետ Տիգրան Ավինյանը դժգոհ է փոսալցման աշխատանքների տեմպից։ Այս մասին նա ասաց Երևանի քաղաքապեարանի գործակարգավարական խորհրդակցության ժամանակ։
Նշենք, որ ձյան տեղումներից հետո Երևանի փողոցներում բազմաթիվ փոսեր են առաջացել։ Սոցցանցերում քաղաքացիները մինչ օրս էլ տեսանյութեր են հրապարակում ու բողոքում, որ փոսերի հետևանքով վնասվում են իրենց ավտոմեքենաները, ինչպես նաև հնարավոր չէ նորմալ երթևեկել։
«Արաբկիր վարչական շրջանի Ավետիսյան փողոցում՝ Փափազյանի խաչմերուկից մինչև Վաղարշ Վաղարշյան փողոցն ընկած հատվածում, ապրիլի 3-ից մեկնարկել են հիմնանորոգման աշխատանքները։ Կենտրոնում Բուզանդ, Պարոնյան, Պռոշյան, Սարյան փողոցներում, իսկ Էրեբունիում՝ Տիտոգրադյանում, միջին նորոգում է իրականացվելու, մրցույթներն արդեն կայացել են։ Այս շաբաթվանից նախատեսում ենք սկսել Բուզանդ, Սարյան և Տիտոգրադյան փողոցների միջին նորոգումները։ Պռոշյան և Պարոնյան փողոցներում սպասում ենք ջրագծի հետ կապված աշխատանքների ավարտին»,- ասաց շինարարության և բարեկարգման վարչության պետի պաշտոնակատար Անդրանիկ Թևոսյանը։
Ավինյանն էլ փոսալցումներին անդրադարձավ և այդ աշխատանքների հետ կապված դժգոհություն հայտնեց։
«Փոսալցման աշխատանքների տեմպը ոնց որ սկսել է ընկնել։ Փետրվարին բացառիկ մեծ տեմպով սկսեցինք փոսալցման աշխատանքներ իրականացնել, հիմա զգում եմ՝ մի քիչ, կամաց-կամաց հարմարվեցինք նորմալ ռեժիմի, չի լինի այդպես»,- նշեց Ավինյանը։
Թևոսյանն ընդգծեց, որ վերջին 11 օրվա ընթացքում միայն 3-4 օր են կարողացել տեմպով աշխատել եղանակային պայմաններից ելնելով։
Ավինյանը պնդեց՝ ասֆալտապատման համար, մանավանդ, երբ խոսքը փոսալցման աշխատանքների մասին է, չկան հանգստյան օրեր, Զատիկ, Նոր տարի և այլն։