ԵՐԵՎԱՆ, 2 ապրիլի – Sputnik. Այսօր խոշոր ավտովթար է տեղի ունեցել Արմավիրի մարզում, որի հետևանքով վարորդներից մեկը տեղում մահացել է։ Այս մասին գրում է shamshyan.com–ը։
«Ժամը 00:20-ի սահմաններում Երևան-Արմավիր ավտոճանապարհի «Դվին» ռեստորանային համալիրի հարևանությամբ բախվել են Արարատի մարզի բնակիչ 31-ամյա Նվեր Շ.-ի վարած «Զիլ» մակնիշի և Արմավիրի մարզի բնակիչ 41-ամյա Արտակ Մ.-ի վարած «Ford Transit» մակնիշի ավտոմեքենաները։ Վթարի հետևանքով «Ford»-ի վարորդը տեղում մահացել է»,–գրում է կայքը։
Նշվում է, որ ավտովթարից հետո, երբ մահացած վարորդի հարազատները եկել են դեպքի վայր, իրավիճակը շատ է լարվել։ Նրանք փորձել են «Զիլ»-ի վարորդին գտնել, նրա մեքենան կոտրել ու հրկիզել։ Սակայն դեպքի վայր ժամանած ոստիկաններին ու փրկարարներին հաջողվել է իրավիճակը հանդարտեցնել։
Դեպքի վայրում հավաքվածները նշել են, որ մահացածը 3 երեխաների հայր է։ «Զիլ»-ի վարորդի մոտ վարորդական իրավունքի վկայական չի եղել։
Վթարի փաստով քննչական բաժնում նախաձեռնվել է քրեական վարույթ։ Քննիչի հանձնարարականով ավտոմեքենաները տեղափոխվում են ՊԾ Արմավիրի մարզի գումարտակի պահպանվող հատուկ տարածք։