ԵՐԵՎԱՆ, 28 մարտի – Sputnik. «Ուժեղ Հայաստանը» հայտարարում է դաշինքի ստեղծման մասին և միանալու կոչ է անում քաղաքական ուժերին։ Կուսակցության խորհրդի անդամ Նարեկ Կարապետյանը տեսաուղերձ է հրապարակել «Ֆեյսբուքի» իր էջում։
«Մեր ժողովուրդը մեզնից միասնականություն է ուզում, միասնականությունն է, որ կբերի ուժեղ խաղաղություն, կուժեղացնի մեր երկիրն ու մեր բաժանված ազգը։ Պառակտումների ժամանակաշրջանը պետք է մնա անցյալում»,– ասում է նա։
Կարապետյանի խոսքով` «Ուժեղ Հայաստանն» իր դռները բացում է բոլոր նոր ուժերի առջև, որոնք ցանկանում են միավորվել և փոխել Հայաստանի ընթացքը, ստեղծել ուժեղ Հայաստան։
«Մենք կստեղծենք դաշինք՝ «Ուժեղ Հայաստան Սամվել Կարապետյանի հետ»։ Միասին կկարողանանք արդարացնել մեր ժողովրդի սպասելիքները, լուծել մեր ազգի առջև ծառացած խնդիրները, որպեսզի 10–20 տարի անց հետ նայենք ու իմանանք, որ ճիշտ որոշում ենք կայացրել` պառակտմանը վերջ տալով։ Ի գործ»,– ընդգծում է նա։
Հիշեցնենք` այս տարվա հունվարի 19–ին հայտնի դարձավ, որ գործարար և բարերար Սամվել Կարապետյանի կողմնակիցները կուսակցություն են գրանցել, որը կոչվում է «Ուժեղ Հայաստան»։ Փետրվարի 11–ին կուսակցության նախագահ ընտրվեց Սամվել Կարապետյանը։ Հաջորդ օրը հայտարարվեց, որ կուսակցության վարչապետի թեկնածուն Սամվել Կարապետյանն է։