ԵՐԵՎԱՆ, 26 մարտի – Sputnik. ՀՀ վարչապետ Նիկոլ Փաշինյանը վստահեցնում է` եթե կենսաթոշակների բարձրացումը երկրում բերի գնաճի, իրենց կառավարությունը կկարողանա այդ ռիսկերը կառավարել։ Նա այդ մասին հայտարարեց գործադիր մարմնի նիստից հետո` լրագրողների հետ ճեպազրույցի ժամանակ անդրադառնալով ՀՀ կենտրոնական բանկի նախագահ Մարտին Գալստյանի հայտարարությանը։
ԿԲ նախագահը մարտի 17-ին ասել էր, որ ապրիլի 1-ից կենսաթոշակների բարձրացումը մինչև 2026 թվականի տարեվերջ կբերի 0.1–0.2 տոկոս գնաճի։
«Բոլոր նրանք, ովքեր մտածում են, թե սխալ ենք արել, որ թոշակները բարձրացրել ենք, թող բարձրաձայնեն այդ մասին։ Գնաճն այնպիսի երևույթ է, որը տնտեսության մեջ և բոլոր տեղերում գոյություն ունի, և դա փաստ է»,– հայտարարեց Փաշինյանը։
Ըստ նրա` տարածաշրջանային և միջազգային իրադրությունն է ավելի շատ գնաճային ռիսկեր առաջացնում, սակայն համոզված է, որ իրենք մաքսիմալ կկառավարեն այդ ռիսկերը։
Հիշեցնենք` ՀՀ կառավարությունը մարտի 5–ին որոշում ընդունեց, որ ապրիլի 1–ից միջին աշխատանքային (ապահովագրական) կենսաթոշակը 48 993-ից կդառնա 59 181 դրամ, իսկ միջին զինվորական կենսաթոշակը՝ 96 321-ից 104 852 դրամ։