ԵՐԵՎԱՆ, 25 մարտի - Sputnik. Հայաստանի հումանիտար օգնությունն Իրանին եղել է Երևանի նախաձեռնությունը, Թեհրանն այդ հարցով չի դիմել։ Sputnik Արմենիային տված բացառիկ հարցազրույցում այս մասին հայտարարել է ԻԻՀ դեսպան Խալիլ Շիրղոլամին։
Դեսպանի խոսքով՝ դա բարեկամական պետության կողմից բարի կամքի դրսևորում էր։ Դիվանագետը բարձր է գնահատում նաև Իրանում տեղի ունեցող իրադարձությունների նկատմամբ հայ հասարակության արձագանքը։ Այս ընթացքում շատերն են իրենց աջակցությունն ու նյութական օգնություն ցուցաբերելու պատրաստակամությունը հայտնել՝ նույնիսկ կոչ անելով դրա համար հատուկ հաշվեհամար բացել։ Իրանական կողմը հնարավորություն է ստեղծել օգնությունը պարզեցված կարգով ուղարկելու համար։
Դեսպանը նաև նշել է, որ Իսլամական Հանրապետությունում իրավիճակը կայուն է, բնակչությունն ապահովված է անհրաժեշտ ամեն ինչով, ապրանքների դեֆիցիտ կամ որևէ խուճապ չկա։
Հիշեցնենք, որ մարտի 23-ին հայտնի դարձավ, որ Հայաստանը ռազմական գործողության մեկնարկից ի վեր առաջին անգամ մարդասիրական օգնություն է ուղարկել Իրան։ Ինչպես հայտնել էր արտգործնախարար Արարատ Միրզոյանը, Երևանն օգնության խմբաքանակ է ուղարկել, հիմնականում՝ դեղորայքի տեսքով։