ԵՐԵՎԱՆ, 19 մարտի – Sputnik. Վանաձորում երկու եղբայր հանցավոր կազմակերպություն են ստեղծել, ներգրավել հիմնականում համաքաղաքացիների, դերաբաշխում արել և հանրապետության տարբեր վայրերում հանցագործություններ ծրագրել ու կատարել։ Տեղեկությունը հայտնում է ՀՀ ՆԳՆ ոստիկանության մամուլի ծառայությունը։
Մարտի 3-ին, հերթական հանցանքը կատարելուց հետո վերադառնալիս, Լոռու քրեական ոստիկանները կանգնեցրել էին «Ռենո» և «Շևրոլե» մակնիշի մեքենաները, որոնցում եղել են եղբայրներն ու ևս հինգ հոգի։ Նրանք ձերբակալվել ու տեղափոխվել էին Լոռու մարզային վարչություն բնակարանային գողություն կատարելու կասկածանքով։ Մեքենաներում և նրանց անձնական խուզարկությամբ հայտնաբերվել էր Արջհովիտ գյուղի մի տնից հափշտակած գողոնը։
Նախաձեռնվել էր քրեական վարույթ։
Պարզվել է, որ արտերկրում բնակվող, քրեական ենթամշակույթ կրող մեկը, օգտագործելով վանաձորցի եղբայրների ունեցած ազդեցությունը, նրանց միջոցով դիմել է Գեղարքունիքի մարզի Զոլաքար գյուղի մի բնակչի, որ վերադարձնի իրեն պարտք 300 հազար ռուսական ռուբլին կամ ավտոմեքենան։
Եղբայրներն էլ քրեական ենթամշակույթում ձևավորված վարքագծով պարտք գումարի 50 տոկոսը վերցնելու դիմաց կազմակերպել են հավաք և խնդրի շուրջ ծավալել պարզաբանումներ։
Նախաձեռնվել է քրեական վարույթ՝ քրեական ենթամշակույթ կրող խմբավորմանը մասնակցելու կամ ներգրավելու հատկանիշներով։
Վանաձորցի եղբայրները կալանավորված են։ Նախաքննությամբ հանգամանքները պարզվում են։