ԵՐԵՎԱՆ, 13 մարտի – Sputnik․ Մեծ պահքն ուժերը, ռեսուրսները մոբիլիզացնելու շրջանն է, ու մենք հիմա ապաշխարության, ինքնաքննության, զղջման, սխալները սրբագրելու փուլում ենք։ Sputnik Արմենիայի հետ զրույցում այս մասին ասաց Քանաքեռի Սուրբ Աստվածածին եկեղեցու քահանա տեր Պսակ Մկրտչյանը։
«Եթե մենք ամբողջ տարին մեղքեր գործենք, սխալներ անենք, հետո Մեծ պահքը փորձենք պահել ամենայն խստությամբ, և միայն այդ շրջանում սխալները սրբագրել, իհարկե, չի լինի։ Սակայն եկեղեցին սահմանել է այդ ժամանակաշրջանը էլ ավելի հոգևոր ներաշխարհին տրվելու, սեփական անձն էլ ավելի քննելու ժամանակ, որ մենք պետք է ամփոփենք մեր անցած ճանապարհը, հետ նայենք, թե ինչ հետագիծ ունենք։ Մեծ պահքը շրջան է, երբ ժամանակակից լեզվով ասած՝ մարդն իր հոգևոր կյանքը ռեսթարթ է անում»,- նշեց հոգևորականը։
Հիշեցնում է՝ Մեծ պահքը երկու կողմ ունի՝ հոգևոր և սննդային պահեցողություն, ու մեկը մյուսին լրացնող են։ Առանց մեկը մյուսի կատարյալ չի լինում։
Հիշեցնենք` Մեծ պահքը, որը տևում է 48 օր՝ մինչև Սուրբ Հարության տոնի նախօրեն, սկսվել է փետրվարի 16-ին: Պահքի 40 օրերը խորհրդանշում են անապատում Քրիստոսի քառասնօրյա աղոթքի, ծոմապահության և ապաշխարության շրջանը: Այս տարի Սուրբ Զատիկը կնշվի ապրիլի 5-ին: