ԵՐԵՎԱՆ, 12 մարտի – Sputnik. 2026 թ. հունվար–փետրվար ամիսներին ֆիզիկական անձանց կողմից իրականացված կանխիկ դրամական միջոցների ներմուծման և արտահանման ավելի քան 450 դեպք է արձանագրվել կամ հայտարարագրվել՝ շուրջ 69 մլն ԱՄՆ դոլարին համարժեք գումարի չափով։ Տեղեկությունը հայտնում է ՀՀ պետական եկամուտների կոմիտեի մամուլի ծառայությունը։
ՊԵԿ–ից տեղեկացնում են, որ նշված գումարից շուրջ 59.5 մլն դոլարի չափով կանխիկ դրամական միջոցները ներմուծվել են Հայաստան, իսկ շուրջ 9.5 մլն դոլարի չափով՝ արտահանվել երկրից։
«Վերլուծությունները ցույց են տալիս, որ կանխիկ դրամական միջոցների զգալի մասը տեղափոխվել է Եվրասիական տնտեսական միության անդամ պետություններից։ Չնայած նրան, որ ԵԱՏՄ շրջանակում կանխիկ դրամական միջոցների ներմուծման և արտահանման մասով առանձին կարգավորումներ սահմանված չեն, այնուամենայնիվ, կանխիկ միջոցների մեծածավալ տեղափոխումը պարունակում է որոշակի ռիսկեր, այդ թվում՝ ստվերային շրջանառություան, փողերի լվացում, ապօրինի ֆինանսական հոսքեր և այլն»,– ասված է հաղորդագրության մեջ։
Կոմիտեից հիշեցնում են, որ 10 000 դոլարը կամ դրան համարժեք գումարը գերազանցող և սահմանով տեղափոխվող կանխիկ դրամական միջոցները ենթակա են հայտարարագրման:
Ըստ այդմ` ՊԵԿ–ը հորդորում է խուսափել խոշոր չափերի կանխիկ դրամական միջոցների տեղափոխումից և հնարավորության դեպքում օգտվել բանկային փոխանցումներից։