ԵՐԵՎԱՆ, 9 մարտի - Sputnik. Ռուսաստանը զգուշացրել է, որ Մերձավոր Արևելքում իրավիճակն ապակայունացնելու փորձերը հարվածի տակ կդնեն վառելիքաէներգետիկ համաշխարհային շուկան, կծնեն նավթի և գազի գների աճ։ Այս մասին նավթի և գազի համաշխարհային շուկայում տիրող իրավիճակի վերաբերյալ խորհրդակցության ժամանակ հայտարարել է ՌԴ նախագահ Վլադիմիր Պուտինը։
«Ռուսաստանը զգուշացնում էր, որ Մերձավոր Արևելքում իրավիճակն ապակայունացնելու փորձերը, անշուշտ, կխախտեն երկարաժամկետ ներդրումային ծրագրերը»,-ասել է Ռուսաստանի նախագահը:
Նրա խոսքով՝ 2025 թվականին Հորմուզի նեղուցով անցել է նավթի համաշխարհային ծովային արտահանման մոտ մեկ երրորդը։
«Հորմուզի նեղուցով օրական մոտ 14 մլն բարել է անցել, որից մոտ 80 տոկոսն ուղղվել է Ասիա-խաղաղօվկիանոսյան տարածաշրջանի երկրներ: Այժմ այդ երթուղին փաստացի փակ է», - ասել էՊուտինը՝ հավելելով, որ նեղուցի օգտագործման հետ կապված նավթի արդյունահանումը կարող է ամբողջությամբ կանգ առնել արդեն առաջիկա ամսում։
Ստեղծված իրավիճակը հանգեցրել էնավթի համաշխարհային գների ավելի քան 30% աճի։
Պուտինը հայտարարել է Եվրոպա էներգառեսուրսների մատակարարումն ամբողջությամբ դադարեցնելու անհրաժեշտության մասին, բացառությամբ Հունգարիայի և Սլովակիայի:
«Ցանկանում եմ հիշեցնել, որ ԵՄ երկրները նախատեսում են ապրիլի 25-ից սկսած լրացուցիչ սահմանափակումներ մտցնել ռուսական ածխաջրածինների, այդ թվում՝ հեղուկացված բնական գազի գնման վրա, մինչև 2027 թվականին նման մատակարարումների լիակատար արգելք։ Մենք չպետք է սպասենք, որ Եվրոպան «ցուցադրաբար փակի դուռը» էներգամատակարարման վրա, այլ ծավալները տեղափոխենք այլ շուկաներ։ Ռուսական էներգետիկ ընկերությունները պետք է օգտվեն նավթի գների ներկայիս իրավիճակից», - ընդգծել է Ռուսաստանի նախագահը։
Նշենք, որ էներգակիրների համաշխարհային շուկաներում բարդ իրավիճակի մասին Վլադիմիր Պուտինն ավելի վաղ հայտարարել էր լրագրող Պավել Զարուբինի «Մոսկվա. Կրեմլ. Պուտին» հաղորդմանը։ Նա նշել էր, որ ներկայիս իրավիճակը նախևառաջ արևմտյան երկրների համակարգային սխալի արդյունք է, ինչպես նաև հիշեցրել էր Ուկրաինայի մասին, որը Եվրոպայում վառելիքի պակասի պայմաններում հարձակվում է գազատարների վրա: