ԵՐԵՎԱՆ, 8 մարտի - Sputnik. Հայաստանի ազգային հավաքականի և ռուսական «Ակրոնի» կիսապաշտպան Էդգար Սևիկյանը պատմել է, որ դիտարկում էր անգլիական «Բլեքբերն Ռովերս» տեղափոխվելու տարբերակը, սակայն այն ձախողվել է։ Այս մասին Սևիկյանը ասել է Metaratings-ին տված հարցազրույցում ` խոսելով «Ֆերենցվարոշից» հեռանալու մասին։
«Ամենահավանական տարբերակն անգլիական «Բլեքբերնն» էր, բայց «Ֆերենցվարոշը» պնդեց, որ մնամ ակումբում: Կար նաև Խորվաթիայի առաջնությունում հայտնվելու տարբերակ: Ռուսաստանի Պրեմիեր լիգայից «Ակրոնն» ամենահամառն էր. նրանք ցանկանում էին ինձ ձեռք բերել, և ի վերջո ես հայտնվեցի այստեղ։ Երբ խոսում ենք Անգլիայի մասին, նույնիսկ եթե դա Չեմպիոնշիփն է, հասկանում ենք, որ դա բոլորովին այլ մակարդակ է, լրիվ այլ ֆուտբոլ: Ինտենսիվության առումով այն թերևս ամենահեշտ առաջնությունը չէ, բայց, ինձ թվում է, դա իսկական ֆուտբոլ է: Անկեղծ ասած՝ տխրել էի, որ այդ տեղափոխությունը չկայացավ։ Հաճելի էր, որ այնտեղ մեկնելու իրական հնարավորություն կար»,–ասել է Սևիկյանը։
Հայ ֆուտբոլիստը չի թաքցնում, որ դեռ ցանկանում է վերադառնալ Եվրոպա (նախկինում նշել էր Իսպանիայում խաղալու ցանկության մասին), սակայն ընդգծում է, որ իր տարիքում ամենակարևորը խաղաժամանակ ստանալն է։
Նշենք, որ Սևիկյանի տրանսֆերային իրավունքները պատկանում են հունգարական «Ֆերենցվարոշին», որի հետ պայմանագիրը նախատեսված է մինչև 2027/28 մրցաշրջանի ավարտը: 2025 թվականի ամառային տրանսֆերային պատուհանի ժամանակ նա վարձավճարով տեղափոխվեց «Ակրոն»: Ռուսաստանի Պրեմիեր լիգայի ընթացիկ՝ 2025/26 մրցաշրջանում 24-ամյա կիսապաշտպանն անցկացրել է 11 հանդիպում և դարձել 1 գոլի հեղինակ: