Անօդաչու թռչող սարքի բեկորները վնասել են Marina 23 երկնաքերը Դուբայի հայտնի զբոսաշրջային շրջանում: Այս մասին հայտնել Է քաղաքային կառավարությունը X սոցցանցում:
«Իշխանությունները հաստատում են, որ բեկորները, որոնք առաջացել են հաջող խոցման արդյունքում, աննշան միջադեպի պատճառ են դարձել Դուբայի «Մարինա» շրջանում գտնվող աշտարակի ճակատային հատվածում։ Իրավիճակը տեղայնացված է», - ասվում է հրապարակման մեջ։
Դեպքի վայր են ժամանել արտակարգ իրավիճակների ծառայությունները: Ինչպես երևում է սոցցանցերում տարածվող կադրերում, 88-րդ հարկից ծուխ է դուրս գալիս։
Ավելի ուշ Դուբայի իշխանությունները հայտնել են, որ Marina-ի շրջանում անօդաչու թռչող սարքի բեկորների ընկնելու հետևանքով մահացել է Ասիայից եկած օտարերկրացի վարորդ:
Հիշեցնենք` ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: