ԵՐԵՎԱՆ, 7 մարտի – Sputnik․ Իսրայելական պաշտպանության բանակը հայտնել է, որ անցած գիշեր ավելի քան 80 կործանիչներ հարվածներ են հասցրել Թեհրանում կառավարական շենքերի և օբյեկտների ուղղությամբ:
Թիրախների թվում են Իմամ Հուսեյնի անվան համալսարանը, որտեղ պատրաստում են Իսլամական հեղափոխության պահապանների կորպուսի (ԻՀՊԿ) սպաներին, ինչպես նաև հրթիռային ստորաբաժանումը, բունկերներ և բալիստիկ հրթիռների պահպանման համար ստորգետնյա ենթակառուցվածքը:
Հրապարակված կադրերում Իրանի Գերագույն դատարանի շենքն է։
Հրապարակվել են նաև տարածաշրջանի խոշոր ծովային հանգույցներից մեկին՝ իրանական Բենդեր Աբաս նավահանգստին հասցված հարվածի կադրերը։
Հիշեցնենք` ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: