ԵՐԵՎԱՆ, 5 մարտի - Sputnik. Իրանական անօդաչու թռչող սարքն ընկել է Նախիջևանի օդանավակայանի տարածքում։ Այս մասին գրում են ադրբեջանական լրատվամիջոցները։
Ադրբեջանական պետական «ԱՊԱ» գործակալությունը նշում է, որ «Իրանը անօդաչուներով հարվածներ է հասցրել Նախիջևանին»։
Սոցիալական ցանցերում կադրեր են տարածվում դեպքի վայրից։
Նշենք, որ Նախիջևանից մինչև Իրանի սահման հեռավորությունը շուրջ 10 կմ է։
Հաղորդվում է, որ ևս մի քանի ԱԹՍ-ներ ընկել են այլ վայրերում։
Հաղորդվում է նաև, որ Նախիջևանում տարհանվել են օդանավակայանի հարևանությամբ գտնվող երկու դպրոցներ։ Որոշումն ընդունվել է ուսուցիչների և աշակերտների անվտանգությունն ապահովելու նպատակով։
Հիշեցնենք` չնայած Ժնևում Օմանի միջնորդությամբ Վաշինգտոնի և Թեհրանի միջև իրանական «միջուկային դոսյեի» շուրջ բանակցություններին, ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: